1 Korint teeb 13 - Yennu Gbounpaauŋ Mɔɔr

Loomm labaar

¹ Tɔn, mi-i lekii fit piak barganii kur, amii ki fit piak malakanba maan, ŋaan ki ki mɔk loommi, n tee kaman nan gingann amii gbekuru fuut nee.

² Mi-i fit sɔkint Yennu mɔmaan, ki bant woonin ni maan kur, ki mɔk bannu, ki mɔk yada nba sa fit te ki jɔɔr-n fikit ki saan boleer po, ŋaan ki ki mɔk loommi, n tee yanne.

³ Mi-i jii n mɔkint kur ki tur tatimm, ki lek jii n gbanant chab ki bi joo muu gbaa Masia paak, ŋaan ki ki mɔk loommi, n ki mɔk nyɔɔti.

⁴ Wunba mɔk loomm, u mɔk sukurue nan burchint niib paak; u ki mɔk funfunn, ki bia ki mɔk wantinmɔŋ, ki bia ki mɔk dontinmɔŋi.

⁵ U ki mɔk nyatuku; u mantik ki loon u mɔŋ nyɔɔt kuukɔɔ kaa; u ki dont wutoor yann yanni; u bia ki dukii bonbiir ki jiint biit biit paaki.

⁶ Wunba mɔk loomm, u ki mɔk parpeenn nan biit po, ŋaan mɔk parpeenn nan barmɔnii po.

⁷ Wunba mɔk loomm ki bakit; u yada nan u dindann nan u sukuru ki mɔk baanu.

⁸ Loomm ki mɔk gbennu. Barsɔkinu nan barganii paku nan bannu tan sa gar.

⁹ Ti bannu nan barsɔkinu na waar;

¹⁰ ŋaan linba na kur-i taŋŋi baar, li yoo na ki ti sa nyik linba waar na kur.

¹¹ Ma din tuu tee bik, n pinpakit nan n bannu nan n dudukit din tuu tee bisuko; ŋaan ma ji tan beer nirɔ, n ji nyik bisin ni bonae.

¹² Ta mi linba mɔtana waar, ki li tee kaman nan ta sa got nyun ni ki li bɔn biaŋinba na; ŋaan ti tan sa lau yeenin ni. Ma mi linba na, li daa waar; ŋaan n tan sa mir fanu kaman nan Yennu nba min biaŋinba na.

¹³ Tɔn, yada nan dindann nan loomm, li bona ŋanntaa daa be mɔtana; ŋaan loomme gar li kur.