1 Jɔɔnn 5 - Yennu Gbounpaauŋ Mɔɔr

Ta sa nyann jinjammii biaŋinba

¹ Binba kur tee yada nan Yisa tee Yennu Niganntɔɔ Masia na, li yabe tee Yennu waas. Ki daanɔ nba loon nisɔɔ, u bia sii loon nirɔ maŋ waase.

² Li-i tee ki ti loon Yennu ki tuun linba ki u sennii nba want biaŋinba, ŋanne sa te ki tin bann nan ti loon Yennu waas;

³ ki li-i biakii tee ki ti dia u sennu, ŋanne want nan ti loonɔ. Ki bia jenna, u sennu maŋ ki paari,

⁴ kimaan binba kur tee Yennu waas, ŋammii fit nyant tingbouŋ na ni jinjammii. Linba te ki ti nyant tingbouŋ na jinjammii na tee ti yada teenue.

⁵ Ki ŋmee sii nyant jinjammii maŋi? Wunba teen yada nan Yisa tee Yennu Bija.

⁶ Ŋɔɔ Yisa Masiae tee wunba din baar nan nyun nan sɔn; u din ki baar nan nyun kuukɔɔ kaa, ŋaan u din baar nan sɔn mun biak. Ki Yennu Seyeeŋ tee siaradaanɔ, kimaan Seyeeŋ na tee barmɔnii daanɔ.

⁷ Tɔn, binba tee siaradamm maŋ tee banntaae;

⁸ ki damm maŋe tee Yennu Seyeeŋ, nan nyun maŋ, nan sɔn maŋ; ki bi banntaa maŋ lakin taan mɔyomm ki tee siara.

⁹ Nnee ki Yennu teen siara u Bija Yisa po, ki u siara maŋ chee nirɔ yar. Ti-i tee nirɔ siara yadaie, ŋann nna ti sii tee Yennu siarae yada ki gar nirɔ yar.

¹⁰ Wunba teen Yennu Bija maŋ yada, ŋɔɔe mɔk Yennu siara maŋ u par ni; ki wunba ki teen u siara maŋ yada, u teenɔ faak daanɔe na, kimaan u ki teen yada nan siara nba ki Yennu teen u Bija po na, a li tee mɔnii.

Manfoor nba kaa gbennu po

¹¹ Yennu siara maŋ tee nnee, a u turit manfoor nba kaa gbennu, ki manfoor maŋ nyi u Bija Yisa nie.

¹² Wunba gaa Yennu Bija na paak, ŋɔɔe mun mɔk manfoor maŋ; ŋaan wunba ki gaa Yennu Bija maŋ paaki, u ki mɔk li manfoori.

¹³ N sɔbin gbouŋ na ki teen yimm nba teen Yennu Bija yada, kimaan n loon ki i bann nan i mɔk manfoor nba kaa gbennu.

¹⁴ Tɔn, ti mei Yennu nan parcheenn, kimaan ti mi nan li-i tee ki ti meiɔ linba ki u loon wun turit na po, tii mi nan u gaan ti miaru.

¹⁵ Ti-i mi nan u set gaan ti miaru, tin bann nan ti poŋ gaar linba ki ti meiɔ li po nawa.

¹⁶ Sɔɔ-i laat u naa bik ki u tuun biit nba kan baar nan kuumi, li daanɔ-ii mei Yennu u paak, ki Yennu-n chab tur biitdaanɔ maŋ manfoor, kimaan u chabit manfoa ki teen binba tuun biit nba ki tee kuun toonni. Ŋaan toonbisiar be, ki tee kuun toonn. N ki yaa a yii mei Yennu kii teen binba tuun biit maŋ booru kaa.

¹⁷ Toona kur nba ki ŋan lek tee biite, ŋaan toonbisai be ki kan baar nan kuumi.

¹⁸ Ki ti mi nan damm nba nyii Yennu ni, bi ki tuun biiti, kimaan Yennu Bija Yisa guub, ki bonbiiuk daanɔ Sintaanii kan teemm siari.

¹⁹ Ki ti bia mi nan timm Masiaweira tee Yennu yabe, ŋaan tingbouŋ na ŋaateeb kur nba ki tee Masiaweira na be Sintaanii nuu ni.

²⁰ Ti mi nan Yennu Bija Yisa din sik tingbouŋ na ni ki tan turit yan a tii bant barmɔnii Yennu. Ta gaa nan u Bija Yisa Masia na paak, ŋanne bia te ki ti gaa nan u Baa Yennu paak; ki ŋɔɔe set tee barmɔnii Yennu, ki bia tee daanɔ nba teent manfoor nba kaa gbennu.

²¹ N waas, nyint i mɔŋ man nan pata ni.