Sálmarnir 4 - Biblían (2007)

¹ Til söngstjórans. Með strengjaleik. Davíðssálmur.

² Svara mér þegar ég hrópa, þú, Guð réttlætis míns. Þá er að mér þrengdi rýmkaðir þú um mig. Miskunna mér og heyr bæn mína.

³ Þér menn: Hve lengi hyggist þér veitast að sæmd minni, elska hégómann og leita til lyginnar? (Sela)

⁴ Vitið að Drottinn er náðugur þeim sem honum er trúr, Drottinn heyrir er ég hrópa til hans.

⁵ Skelfist en syndgið ekki, hugleiðið þetta í hvílum yðar og verið hljóðir. (Sela)

⁶ Færið réttar fórnir og treystið Drottni.

⁷ Margir segja: „Hver lætur oss hamingju líta?“ Drottinn, lát ljós auglitis þíns lýsa yfir oss.

⁸ Þú hefur glatt hjarta mitt meira en aðrir gleðjast yfir gnægð korns og víns.

⁹ Í friði leggst ég til hvíldar og sofna því að þú einn, Drottinn, lætur mig hvíla óhultan í náðum.