Sálmarnir 2 - Biblían (2007)

¹ Hví gera þjóðirnar samsæri, hví hyggja þær á fánýt ráð?

² Konungar jarðar rísa upp, höfðingjar ráða ráðum sínum gegn Drottni og hans smurða:

³ „Vér skulum slíta fjötra þeirra og varpa af oss viðjum þeirra.“

⁴ Hann, sem situr á himni, hlær, Drottinn gerir gys að þeim.

⁵ Hann talar til þeirra í reiði sinni og skelfir þá í bræði sinni:

⁶ „Konung minn hef ég krýnt á Síon, mínu heilaga fjalli.“

⁷ Ég vil kunngjöra úrskurð Drottins, hann sagði við mig: „Þú ert sonur minn, í dag hef ég fætt þig.

⁸ Bið þú mig, og ég gef þér þjóðir að erfðum og víða veröld til eignar:

⁹ Þú skalt mola þær með járnstaf, mylja þær eins og leirker.“

¹⁰ Verið því hyggnir, þér konungar, látið yður segjast, höfðingjar þjóða.

¹¹ Þjónið Drottni með lotningu, kyssið fætur hans titrandi

¹² til að firra yður reiði hans svo að þér farist ekki á veginum

¹³ því að skjótt blossar upp reiði hans. Sæll er sá er leitar hælis hjá honum.