Sakaría 3 - Biblían (2007)

Fjórða sýn: Jósúa æðsti prestur

¹ Þessu næst lét hann mig sjá Jósúa æðsta prest. Hann stóð frammi fyrir engli Drottins en á hægri hönd honum Satan til að flytja kæru sína gegn honum.

² En Drottinn mælti til Satans: „Drottinn ávíti þig, ákærandi. Er þessi maður ekki sem brandur úr báli dreginn?“

³ En Jósúa var í óhreinum klæðum þar sem hann stóð andspænis englinum.

⁴ Engillinn tók þá til máls og sagði við þá sem stóðu frammi fyrir honum: „Færið hann úr þessum óhreinu klæðum.“ Síðan sagði hann við Jósúa: „Sjá, ég nem burt sök þína og læt færa þig í skrúða.“

⁵ Og hann sagði: „Látið hreina ennisspöng á höfuð hans.“ Þeir létu þá hreina ennisspöng á höfuð hans og færðu hann í skrúðann. Og engill Drottins stóð hjá.

⁶ Og engill Drottins ávarpaði Jósúa með þessum orðum:

⁷ Svo segir Drottinn allsherjar: Ef þú gengur á mínum vegum og heldur boðorð mín skaltu einnig stjórna húsi mínu og gæta forgarða þess og ég heimila þér að samneyta þessum þjónum mínum.

⁸ Hlýddu á, Jósúa æðsti prestur, þú og félagar þínir, sem sitja andspænis þér, þeir eru tákn þess að ég mun láta Sprota, þjón minn, koma

⁹ því að hér er steinninn sem ég set fram fyrir Jósúa, einn steinn og á honum sjö augu. Ég gref á hann letrið, segir Drottinn allsherjar, og á einum degi nem ég burt sök þessa lands.

¹⁰ Á þeim degi, segir Drottinn allsherjar, mun hver maður bjóða granna sínum undir vínvið sinn og fíkjutré.