Orðskviðirnir 9 - Biblían (2007)

Speki og heimska

¹ Spekin hefur reist sér hús og höggvið til sjö stólpa sína.

² Hún hefur slátrað sláturfé sínu, blandað vín sitt og búið borð sitt.

³ Hún hefur sent út þernur sínar, hún kallar af hæðunum í borginni:

⁴ „Hver sem óreyndur er komi hingað.“ Og við hinn fávísa segir hún:

⁵ „Komið, etið mat minn og drekkið vínið sem ég hef blandað.

⁶ Látið af flónsku, þá munuð þér lifa, gangið á braut skynseminnar.“

⁷ Sá sem átelur háðskan mann verður aðhlátursefni og sá sem ávítar hinn rangláta verður hafður að háði.

⁸ Ávítaðu ekki hinn háðska svo að hann hati þig ekki, ávítaðu hinn vitra og hann mun elska þig.

⁹ Gefðu hinum vitra, þá verður hann að vitrari, fræddu hinn réttláta og hann mun auka lærdóm sinn.

¹⁰ Að óttast Drottin er upphaf spekinnar og að þekkja Hinn heilaga er hyggindi.

¹¹ Með mínu fulltingi verða dagar þínir margir og árum lífs þíns fjölgar.

¹² Sértu vitur verður vitið þér til góðs en sértu spottari þá mun það bitna á þér einum.

¹³ Heimskan er eirðarlaus, léttúðug og veit ekkert.

¹⁴ Hún situr við dyr sínar, býr sér sess á hæðum borgarinnar

¹⁵ til þess að kalla á þá sem fara hjá, þá sem stefna fram á leið sinni:

¹⁶ „Hver sem óreyndur er komi hingað.“ Og við hinn fávísa segir hún:

¹⁷ „Stolið vatn er sætt og lostætt er launetið brauð.“

¹⁸ Og hann veit ekki að þar eru heimkynni hinna dauðu, að gestir hennar hafna í djúpum heljar.