Orðskviðirnir 4 - Biblían (2007)

Ávinningur spekinnar

¹ Heyrið, synir, áminningu föður yðar og hlustið á svo að þér öðlist skilning.

² Góðan lærdóm veiti ég yður, hafnið ekki tilsögn minni.

³ Þegar ég var sonur í föðurhúsum, viðkvæmt einkabarn móður minnar,

⁴ þá kenndi faðir minn mér og sagði við mig: „Hjarta þitt haldi fast við orð mín, varðveittu fyrirmæli mín og þá muntu lifa.

⁵ Aflaðu þér visku, aflaðu þér hygginda. Gleymdu ekki orðum mínum og víktu ekki frá þeim.

⁶ Hafnaðu ekki viskunni, hún mun varðveita þig, elskaðu hana og þá mun hún vernda þig.

⁷ Viska er fyrir öllu, aflaðu þér visku, kostaðu öllu til að afla þér hygginda.

⁸ Hafðu hana í hávegum og þá mun hún hefja þig, faðmaðu hana og hún mun verða þér til sæmdar.

⁹ Hún mun setja unaðslegan sveig á höfuð þér og sæma þig glæstri kórónu.“

¹⁰ Hlustaðu, sonur minn, og gefðu gaum að orðum mínum, þá verða æviár þín mörg.

¹¹ Ég vísa þér veg spekinnar og leiði þig á braut ráðvendninnar,

¹² á göngunni verður leið þín ekki þröng og hlaupirðu muntu ekki hrasa.

¹³ Varðveittu leiðsögnina og slepptu henni ekki, varðveittu hana því að hún er líf þitt.

¹⁴ Farðu ekki brautir ranglátra og gakktu ekki á vegi vondra manna.

¹⁵ Sneiddu hjá honum, farðu hann ekki, snúðu frá honum og farðu fram hjá.

¹⁶ Þeir geta ekki sofið nema þeir hafi gert illt og þeim kemur ekki dúr á auga nema þeir hafi fellt einhvern,

¹⁷ brauð glæpsins eta þeir og drekka vín ofbeldisins.

¹⁸ Gata réttlátra er eins og bjartur árdagsljómi, því bjartari sem nær líður hádegi.

¹⁹ Vegur ranglátra er eins og niðamyrkur, þeir vita ekki um hvað þeir hrasa.

²⁰ Sonur minn, gefðu gaum að máli mínu, hneigðu eyra þitt að orðum mínum.

²¹ Láttu þau ekki víkja frá augum þínum, varðveittu þau innst í hjarta þínu

²² því að þau eru líf þeim sem hljóta þau og lækning öllum líkama þeirra.

²³ Varðveit hjarta þitt framar öllu öðru því að þar eru uppsprettur lífsins.

²⁴ Haltu munni þínum fjarri fláum orðum og vörum þínum fjarri lygamálum.

²⁵ Beindu augum þínum fram á við og sjónum þínum að því sem fram undan er.

²⁶ Veldu fótum þínum beina braut, þá verður ætíð traust undir fótum.

²⁷ Víktu hvorki til hægri né vinstri, haltu fæti þínum frá illu.