Orðskviðirnir 3 - Biblían (2007)

Leiðin til spekinnar

¹ Sonur minn, gleymdu ekki kenningu minni og hjarta þitt varðveiti ráð mín

² því að langa lífdaga, farsæl ár og velgengni munu þau veita þér ríkulega.

³ Kærleikur og tryggð munu aldrei yfirgefa þig. Festu þau um háls þér og ritaðu þau á spjald hjarta þíns,

⁴ þá muntu hljóta hylli og góð hyggindi, jafnt í augum Guðs sem manna.

⁵ Treystu Drottni af öllu hjarta en reiddu þig ekki á eigið hyggjuvit.

⁶ Minnstu hans á öllum vegum þínum, þá mun hann gera leiðir þínar greiðar.

⁷ Þú skalt ekki þykjast vitur en óttast Drottin og forðast illt,

⁸ það er heilnæmt líkama þínum og hressing beinum þínum.

⁹ Tignaðu Drottin með eigum þínum og með frumgróða allrar uppskeru þinnar,

¹⁰ þá verða hlöður þínar fullar og vínberjalögurinn mun flóa úr vínþróm þínum.

¹¹ Sonur minn, hafnaðu ekki leiðsögn Drottins og láttu þér ekki gremjast umvöndun hans.

¹² Drottinn agar þann sem hann elskar og lætur þann son finna til sem hann hefur mætur á.

¹³ Sæll er sá maður sem öðlast speki, sá sem hlýtur hyggindi.

¹⁴ Því að betra er að afla sér hennar en silfurs og arðurinn af henni er betri en gull.

¹⁵ Hún er dýrmætari en perlur, allir dýrgripir þínir jafnast ekki á við hana.

¹⁶ Langir lífdagar eru í hægri hendi hennar, auður og sæmd í vinstri hendi hennar.

¹⁷ Vegir hennar eru yndislegir vegir og allar götur hennar liggja til velfarnaðar.

¹⁸ Hún er tré lífsins þeim sem höndla hana og sæll er hver sá er heldur fast í hana.

¹⁹ Drottinn grundvallaði jörðina með visku og kom himninum fyrir af speki.

²⁰ Fyrir þekkingu hans mynduðust hafdjúpin og döggin drýpur úr skýjunum.

²¹ Sonur minn, varðveittu visku og gætni, láttu þær ekki víkja frá augum þínum,

²² þá verða þær sálu þinni til lífs og hálsi þínum til prýði.

²³ Þá muntu ganga veg þinn óhultur og ekki hrasa.

²⁴ Þegar þú leggst til hvíldar þarftu ekki að hræðast og sofnir þú verður svefninn vær.

²⁵ Þú þarft hvorki að kvíða felmtrinu né eyðingu hinna ranglátu þegar hún dynur yfir

²⁶ því að Drottinn verður athvarf þitt og varðveitir fót þinn svo að hann verði ekki fanginn.

²⁷ Synjaðu ekki góðs þeim sem þarfnast ef það er á þínu valdi að veita það.

²⁸ Segðu ekki við náunga þinn: „Farðu og komdu aftur. Á morgun skal ég gefa þér,“ ef þú átt það til.

²⁹ Bruggaðu ekki vélræði gegn náunga þínum meðan hann dvelst öruggur hjá þér.

³⁰ Deildu ekki við neinn að ástæðulausu hafi hann ekki gert neitt á hlut þinn.

³¹ Öfundaðu ekki ofbeldismanninn og sækstu ekki eftir neinum verkum hans.

³² Því að andstyggð er sá Drottni sem afvega fer en ráðvandir menn eru alúðarvinir hans.

³³ Bölvun Drottins er yfir húsi hins rangláta en bústað réttlátra blessar hann.

³⁴ Háðska menn hæðir hann en hógværum veitir hann náð.

³⁵ Vitrir menn hljóta heiður en heimskingjar bera smán úr býtum.