Orðskviðirnir 29 - Biblían (2007)

¹ Þeim sem oft hefur verið átalinn en þrjóskast við verður skyndilega hrundið og engin lækning fæst.

² Þegar réttlátum vex máttur gleðst þjóðin en þegar ranglátir drottna stynur þjóðin.

³ Sá sem elskar visku gleður föður sinn en sá sem leggur lag sitt við skækjur glatar eigum sínum.

⁴ Konungurinn eflir landið með rétti en þungar álögur eyða það.

⁵ Smjaðri maður fyrir náunga sínum leggur hann net fyrir fætur hans.

⁶ Í misgjörð vonds manns er honum búin snara en réttlátur maður fagnar og gleðst.

⁷ Réttlátur maður kynnir sér málefni hinna lágt settu en ranglátur maður hirðir ekki um að kynna sér þau.

⁸ Spottarar æsa upp borgina en vitrir menn lægja reiðina.

⁹ Þegar vitur maður á í þrætu við afglapa reiðist og hlær afglapinn en lausn fæst engin.

¹⁰ Blóðvargarnir hata hinn ráðvanda en réttvísir menn láta sér annt um líf hans.

¹¹ Heimskinginn eys út allri reiði sinni en vitur maður hefur stjórn á henni.

¹² Þegar valdhafinn hlýðir á lygaorð verða allir þjónar hans sekir.

¹³ Fátæklingurinn og kúgarinn mætast, Drottinn ljær ljós augum beggja.

¹⁴ Dæmi konungur hina lágt settu af réttvísi mun hásæti hans standa stöðugt að eilífu.

¹⁵ Vöndur og umvöndun veita speki en agalaus sveinn gerir móður sinni skömm.

¹⁶ Þegar ranglátum fjölgar, fjölgar og misgjörðum en réttlátir munu horfa á fall þeirra.

¹⁷ Agaðu son þinn, þá mun hann láta þig hafa ró og veita sál þinni unað.

¹⁸ Þar sem engar vitranir eru týnir fólk áttum en sá sem varðveitir lögmálið er sæll.

¹⁹ Þræll verður ekki agaður með orðum, hann skilur þau að vísu en fer ekki eftir þeim.

²⁰ Sjáir þú mann sem er fljótfær í orðum, þá á heimskinginn meiri von en hann.

²¹ Dekri maður við þræl sinn frá barnæsku verður hann vanþakklátur að lokum.

²² Reiðigjarn maður vekur deilur og skapbráður maður drýgir marga synd.

²³ Hroki mannsins lægir hann en sæmd bíður hins hógværa.

²⁴ Þjófsnauturinn hatast við sjálfan sig, hann hlýðir á bölvunina en lætur þó ekkert uppi.

²⁵ Ótti við menn leiðir í snöru en þeim er borgið sem treystir Drottni.

²⁶ Margir leita hylli valdhafans en réttur mannsins kemur frá Drottni.

²⁷ Andstyggð réttlátra er sá sem ranglæti fremur og andstyggð ranglátra sá sem breytir ráðvandlega.