Orðskviðirnir 28 - Biblían (2007)

¹ Hinir ranglátu flýja þótt enginn elti þá en hinir réttlátu eru óttalausir eins og ungt ljón.

² Þegar uppreisn verður í landinu gerast þar margir höfðingjar en meðal skynsamra og hygginna manna mun góð skipan lengi standa.

³ Maður sem er fátækur og situr á hlut snauðra er eins og steypiregn sem spillir uppskeru.

⁴ Þeir sem hafna fræðslu hrósa ranglátum en þeir sem fræðsluna þiggja berjast gegn þeim.

⁵ Illmenni skilja ekki hvað rétt er en þeir sem leita Drottins skilja allt.

⁶ Betri er fátækur maður og ráðvandur en ríkur maður og undirförull.

⁷ Sá sem varðveitir kenninguna er hygginn sonur en sá sem leggur lag sitt við óhófsmenn gerir föður sínum smán.

⁸ Sá sem eykur auð sinn með fjárleigu og vöxtum safnar honum handa þeim sem líknar fátækum.

⁹ Daufheyrist maður við lögmálinu verður bæn hans andstyggð.

¹⁰ Sá sem tælir heiðarlega menn á glapstigu fellur sjálfur í gröf sína en ráðvöndum mun vel farnast.

¹¹ Ríkur maður þykist vitur en snauður maður og hygginn sér við honum.

¹² Þegar hinir réttlátu fagna er mikið um dýrðir en þegar vegur ranglátra vex forða menn sér.

¹³ Sá sem dylur yfirsjónir sínar verður ekki lánsamur en sá sem játar þær og lætur af þeim hlýtur miskunn.

¹⁴ Sæll er sá maður sem ávallt er var um sig en sá sem herðir hjarta sitt fellur í ógæfu.

¹⁵ Eins og grenjandi ljón og gráðugur björn, svo er ranglátur drottnari yfir magnlítilli þjóð.

¹⁶ Skilningssljór höfðingi er harður kúgari en langlífur verður sá sem hatar rangfenginn auð.

¹⁷ Sá maður, sem blóðsök hvílir á, er á flótta fram á grafarbakkann, enginn aðstoði hann.

¹⁸ Sá sem breytir ráðvandlega mun frelsast en sá fellur í gryfju sem beitir undirferli.

¹⁹ Sá sem yrkir land sitt mettast af brauði en sá sem sækist eftir hégóma mettast af fátækt.

²⁰ Áreiðanlegur maður blessast ríkulega en sá sem fljótt vill verða ríkur sleppur ekki við refsingu.

²¹ Hlutdrægni er röng en þó fremja menn ranglæti fyrir einn brauðbita.

²² Nískur maður er á þönum eftir auði og veit ekki að örbirgðin mun elta hann uppi.

²³ Sá sem ávítar mann öðlast síðar meiri hylli en tungumjúkur smjaðrari.

²⁴ Sá sem rænir foreldra sína og segir: „Það er engin synd,“ er lagsbróðir eyðandans.

²⁵ Ágjarn maður vekur deilur en þeim sem treystir Drottni farnast vel.

²⁶ Sá sem treystir á eigið hyggjuvit er heimskingi en sá sem breytir viturlega mun bjargast.

²⁷ Sá sem gefur fátækum líður engan skort en þeim sem byrgir augu sín verður víða formælt.

²⁸ Þegar vegur ranglátra vex fela menn sig en þegar þeir tortímast fjölgar réttlátum.