Orðskviðirnir 25 - Biblían (2007)

¹ Þetta eru líka orðskviðir Salómons sem menn Hiskía Júdakonungs söfnuðu:

² Guði er sæmd að dylja mál, konungum sæmd að útkljá mál.

³ Eins og hæð himins og dýpt jarðar, svo eru konungshjörtun órannsakanleg.

⁴ Sé sorinn tekinn úr silfrinu, þá fær smiðurinn ker úr því.

⁵ Séu hinir ranglátu teknir burt frá augliti konungsins, þá verður hásæti hans stöðugt í réttlæti.

⁶ Stærðu þig ekki frammi fyrir konunginum og ætlaðu þér ekki stað stórmenna

⁷ því að betra er að menn segi við þig: „Færðu þig hingað upp,“ en að menn niðurlægi þig frammi fyrir tignarmanni. Hvað sem augu þín kunna að hafa séð,

⁸ vertu þá ekki of hvatur í málavafstur því að hverjar verða lyktirnar ef náungi þinn gerir þér minnkun?

⁹ Verðu rétt þinn gegn náunga þínum en ljóstraðu ekki upp leyndarmálum annars manns

¹⁰ til þess að sá sem heyrir það átelji þig ekki og þú fáir á þig varanlegt óorð.

¹¹ Gullepli í silfurskálum, svo eru vel valin orð.

¹² Eins og gullhringur og skartgripur af skíru gulli, svo er áminning viturs manns sem hlýtt er á.

¹³ Eins og snjósvali um uppskerutímann, svo er áreiðanlegur sendiboði þeim sem sendir hann því að hann hressir sál húsbónda síns.

¹⁴ Ský og vindur en engin rigning, svo er sá sem hrósar sér af örlæti en gefur þó ekkert.

¹⁵ Með þolinmæði má telja höfðingja hughvarf, mjúk tunga mylur bein.

¹⁶ Finnir þú hunang, fáðu þér nægju þína svo að þú verðir ekki ofsaddur af því og spýir því upp.

¹⁷ Stígðu fæti þínum hóflega oft í hús náunga þíns svo að hann verði ekki leiður á þér og honum í nöp við þig.

¹⁸ Sleggja, sverð, hvöss ör, svo er sá sem ber falsvitni gegn náunga sínum.

¹⁹ Laus tönn og hrasandi fótur, slíkt er traust á svikara á degi neyðarinnar.

²⁰ Að fara úr fötum í kalsaveðri, að hella ediki í sár, eins er að syngja sorgmæddum gleðisöngva.

²¹ Ef óvin þinn hungrar, gefðu honum þá að eta og þyrsti hann, gefðu honum þá að drekka

²² því að þú safnar glóðum elds að höfði honum og Drottinn mun endurgjalda þér það.

²³ Norðanvindurinn ber með sér regn og launskraf reiðileg andlit.

²⁴ Betri er dvöl í horni á húsþaki en sambúð við þrasgjarna konu.

²⁵ Eins og kalt vatn í skrælnaða kverk, svo er heillafregn úr fjarlægu landi.

²⁶ Eins og grugguð lind og skemmdur brunnur, svo er réttlátur maður er lætur undan vondum manni.

²⁷ Of mikið hunangsát er ekki gott, vertu því spar á hólið.

²⁸ Eins og opin borg án borgarmúra, svo er sá maður sem ekki hefur stjórn á skapi sínu.