Orðskviðirnir 23 - Biblían (2007)

¹ Þegar þú situr til borðs með valdhafa, gættu þess þá vel hvern þú hefur fyrir framan þig

² og settu hníf við barka þér sértu gráðugur.

³ Láttu þig ekki langa í kræsingar hans því að þær eru hverful fæða.

⁴ Leitastu ekki við að verða ríkur, hafðu vit á að gera það ekki.

⁵ Beinir þú augum þínum til auðsins er hann horfinn. Hann á sér vængi sem örn og hverfur til himins.

⁶ Matastu ekki hjá nískum manni og láttu þig ekki langa í kræsingar hans.

⁷ Hann er eins og maður sem telur eftir. „Et og drekk,“ segir hann við þig en hugur fylgir ekki máli.

⁸ Bitanum, sem þú kyngdir, verður þú að spýta upp aftur og fagurgalanum hefur þú sólundað.

⁹ Talaðu ekki fyrir eyrum heimskingjans því að hann fyrirlítur skynsemisorð þín.

¹⁰ Færðu ekki úr stað landamerki ekkjunnar og gakktu ekki inn á akra munaðarleysingjanna

¹¹ því að lausnari þeirra er máttugur, hann mun flytja mál þeirra gegn þér.

¹² Snúðu hjarta þínu að umvönduninni og eyrum þínum að orðum viskunnar.

¹³ Sparaðu ekki aga við hinn unga, ekki deyr hann þótt þú sláir hann með vendi.

¹⁴ Þú slærð hann með vendinum og frelsar líf hans frá helju.

¹⁵ Sonur minn, verði hjarta þitt viturt, þá gleðst ég líka í hjarta mínu

¹⁶ og nýru mín fagna þegar varir þínar mæla það sem rétt er.

¹⁷ Öfundaðu ekki syndara í hjarta þínu en guðhrædda menn ævinlega.

¹⁸ Þá áttu þér framtíð og von þín mun aldrei bregðast.

¹⁹ Hlustaðu, sonur minn, vertu vitur og beindu hjarta þínu á rétta leið.

²⁰ Vertu ekki með drykkjurútum eða þeim sem háma í sig kjöt

²¹ því að drykkjumenn og mathákar verða snauðir og víman mun klæða þig í tötra.

²² Hlustaðu á föður þinn sem gat þig og fyrirlíttu ekki móður þína þegar hún verður gömul.

²³ Kauptu sannleika, og seldu hann ekki, visku, fræðslu og skilning.

²⁴ Faðir réttláts manns fagnar og sá sem gat vitran son gleðst yfir honum.

²⁵ Faðir þinn og móðir gleðjist og fagni sú sem fæddi þig.

²⁶ Sonur minn, gefðu mér hjarta þitt og láttu augu þín gaumgæfa vegu mína.

²⁷ Skækja er djúp gröf og framandi kona þröngur pyttur.

²⁸ Hún liggur í leyni eins og ræningi og fjölgar hinum ótrúu meðal mannanna.

²⁹ Hver barmar sér? Hver veinar? Hver á í stælum? Hver kvartar? Hver fær sár að þarflausu? Hver rauð augu?

³⁰ Þeir sem sitja við vín fram á nætur, þeir sem koma saman til að bergja á vínblöndu.

³¹ Horfðu ekki á vínið, hve rautt það er, hvernig það glóir í bikarnum og rennur ljúflega niður.

³² Að síðustu bítur það sem höggormur og spýtir eitri sem naðra.

³³ Augu þín munu sjá kynlega hluti og munnur þinn mæla fáránleika.

³⁴ Þú verður eins og sá sem liggur í úthafinu miðju, eins og sá er liggur efst uppi á siglutré.

³⁵ „Þeir slógu mig, ég kenndi ekki til, þeir börðu mig, ég varð þess ekki var. Þegar ég vakna af víninu fæ ég mér meira.“