Orðskviðirnir 22 - Biblían (2007)

¹ Gott mannorð er dýrmætara en mikill auður, vinsældir eru betri en silfur og gull.

² Ríkur og fátækur mætast en Drottinn skapaði báða.

³ Vitur maður sér ógæfuna og felur sig en einfeldningarnir halda áfram og gjalda þess.

⁴ Laun auðmýktar og ótta Drottins eru auður, sæmd og líf.

⁵ Þyrnar og snörur eru á vegi hinna fláráðu, sá sem annt er um líf sitt forðast þá.

⁶ Fræð hinn unga um veginn sem hann á að halda og á gamals aldri mun hann ekki af honum víkja.

⁷ Ríkur maður drottnar yfir fátækum og lánþeginn verður þræll lánardrottins síns.

⁸ Sá sem sáir ranglæti uppsker ógæfu, sproti heiftar hans verður að engu.

⁹ Hinn örláta munu menn blessa því að hann gefur hinum fátæka af brauði sínu.

¹⁰ Rektu spottarann burt, þá hverfur deilan og þá linnir þrætu og smán.

¹¹ Sá sem ástundar hreinleika hjartans vinnur hylli konungs með geðfelldum orðum vara sinna.

¹² Augu Drottins gæta viskunnar en orðum svikarans kollvarpar hann.

¹³ Letinginn segir: „Ljón er úti fyrir, ég verð drepinn fari ég út.“

¹⁴ Djúp gröf er munnur framandi kvenna, sá sem verður fyrir reiði Drottins fellur í hana.

¹⁵ Setjist heimskan að í hjarta sveinsins, þá mun vöndur agans reka hana þaðan.

¹⁶ Að kúga fátækan sér til ávinnings er eins og að gefa ríkum manni; hvort tveggja verður til þess eins að gera mann snauðan.

Orð hinna vitru

¹⁷ Hneig eyra þitt og hlusta á orð hinna vitru, veit fræðslu minni athygli.

¹⁸ Gott er að þú geymir þau í brjósti þér, að þau verði sífellt á vörum þér.

¹⁹ Til þess að traust þitt sé á Drottni fræði ég þig í dag, já, þig.

²⁰ Hef ég ekki ritað þér þrjátíu sinnum heilræði og fræðslu

²¹ til þess að gera þér ljósan sannleika, sannleiksorð, svo að þú flytjir þeim áreiðanleg orð er senda þig?

²² Rændu ekki fátæklinginn af því að hann er fátækur og níðstu ekki á lítilmagnanum í borgarhliðinu

²³ því að Drottinn mun flytja mál þeirra og ræna þá lífinu er þá ræna.

²⁴ Leggðu ekki lag þitt við reiðigjarnan mann og eigðu ekki samneyti við hinn skapbráða

²⁵ til þess að þú temjir þér ekki hegðun hans og leggir snörur fyrir líf þitt.

²⁶ Vertu ekki einn af þeim sem ganga til handsala, þeim sem ganga í ábyrgð fyrir skuldum.

²⁷ Þegar þú átt ekkert að greiða með, þá verður hvílan tekin undan þér.

²⁸ Færðu ekki úr stað hin fornu landamerki sem forfeður þínir hafa sett.

²⁹ Sjáir þú mann vel færan í verki sínu mun hann veita konungum þjónustu sína en ekki þjóna ótignum mönnum.