Orðskviðirnir 21 - Biblían (2007)

¹ Hjarta konungsins er sem lækir í hendi Drottins, hann sveigir þá hvert sem honum þóknast.

² Maðurinn telur alla hætti sína rétta en Drottinn vegur hjörtun.

³ Að ástunda réttlæti og rétt er Drottni þóknanlegra en sláturfórn.

⁴ Drembilát augu og hrokafullt hjarta, lampi ranglátra er syndin.

⁵ Áform hins iðjusama færa arð en hroðvirkni endar í örbirgð.

⁶ Fjársjóðir, fengnir með lygum, eru sem svipull vindblær og snörur dauðans.

⁷ Ráðríki ranglátra feykir þeim burt því að þeir hafna réttlátri breytni.

⁸ Hlykkjótt er leið hins seka en verk hins hreina eru vammlaus.

⁹ Betri er dvöl í horni á húsþaki en sambúð við þrasgjarna konu.

¹⁰ Hinn rangláti girnist illt, náungi hans finnur enga miskunn hjá honum.

¹¹ Sé spottaranum refsað verður hinn fávísi hygginn og sé vitur maður fræddur vex hann að viti.

¹² Hinn réttláti fylgist með húsi hins rangláta og steypir óguðlegum í ógæfu.

¹³ Sá sem daufheyrist við kveini hins fátæka mun sjálfur kalla og ekki fá bænheyrslu.

¹⁴ Gjöf á laun sefar reiði og umbun í leyni ákafa bræði.

¹⁵ Réttlátum manni er gleði að gera það sem rétt er en illvirkjum er það skelfing.

¹⁶ Sá maður sem villist af vegi viskunnar mun brátt hvílast í samneyti framliðinna.

¹⁷ Öreigi verður sá sem sólginn er í skemmtanir, sá sem sólginn er í vín og olíu verður ekki ríkur.

¹⁸ Hinn rangláti er lausnargjald hins réttláta og svikarinn kemur í stað hinna vammlausu.

¹⁹ Betra er að búa í eyðimörk en með þrasgjarnri og geðillri konu.

²⁰ Dýrmætur fjársjóður og olía er í heimkynnum hins vitra en heimskur maður sólundar því.

²¹ Sá sem ástundar réttlæti og kærleika öðlast líf, velgengni og heiður.

²² Vitur maður vann borg kappanna og reif niður vígið sem hún treysti á.

²³ Sá sem gætir munns síns og tungu forðar sjálfum sér frá nauðum.

²⁴ Sá sem er hrokafullur og dramblátur kallast spottari, hann lætur stýrast af skefjalausum hroka.

²⁵ Óskir letingjans verða honum að falli, hendur hans vilja ekki vinna,

²⁶ langanir fylla hug hans daglangt en hinn réttláti gefur og er ekki naumur.

²⁷ Sláturfórn hins rangláta er Drottni andstyggð, einkum sé hún færð af illum ásetningi.

²⁸ Falsvottur mun tortímast en sá sem hlustar grannt er vitnisbær.

²⁹ Illmennið setur upp þóttafullan svip en hinn vammlausi hyggur að háttum sínum.

³⁰ Engin viska, engin skynsemi, engin ráð eru til gegn Drottni.

³¹ Hesturinn er búinn til orrustudagsins en sigurinn er í hendi Drottins.