Orðskviðirnir 20 - Biblían (2007)

¹ Vínið er illkvittið, sterkur drykkur glaumsamur, fávís verður sá sem lætur leiðast afvega.

² Reiði konungs er eins og ljónsöskur, sá sem egnir hann gegn sér hættir lífi sínu.

³ Það er manni sómi að forðast deilur en afglapinn kveikir þrætur.

⁴ Letinginn plægir ekki á réttum tíma, því leitar hann um uppskerutímann og grípur í tómt.

⁵ Ráð mannshjartans eru sem djúp vötn og hygginn maður eys af þeim.

⁶ Margir láta vingjarnlega en tryggan vin, hver finnur hann?

⁷ Réttlátur maður ástundar ráðvendni, sæl verða börn hans eftir hann.

⁸ Þegar konungur situr á dómstóli vinsar hann allt illt úr með augnaráðinu einu.

⁹ Hver getur sagt: „Ég hef haldið hjarta mínu hreinu, ég er hreinn af synd?“

¹⁰ Tvenns konar vog og tvenns konar mál, hvort tveggja er Drottni andstyggð.

¹¹ Jafnvel má þekkja af verkum barnsins hvort athafnir þess eru hreinar og einlægar.

¹² Eyrað sem heyrir og augað sem sér, hvort tveggja hefur Drottinn skapað.

¹³ Elskaðu ekki svefninn svo að þú verðir ekki snauður, opnaðu augun, þá muntu mettast af brauði.

¹⁴ „Afleitt, afleitt,“ segir kaupandinn en þegar hann gengur burt hælist hann um.

¹⁵ Gnægð er af gulli og perlum en dýrmætastar eru þó vitrar varir.

¹⁶ Taktu skikkjuna af þeim sem hefur gengið í ábyrgð fyrir ókunnugan, taktu veð af þeim sem hefur gengið í ábyrgð fyrir framandi.

¹⁷ Sætt er svikabrauðið en eftir á fyllist munnurinn möl.

¹⁸ Vel ráðin áform fá framgang, þiggðu hollráð ef þú heyr stríð.

¹⁹ Vesæll er sá sem ljóstrar upp leyndarmálum, hafðu ekki samneyti við málugan mann.

²⁰ Formæli maður föður og móður mun lampi hans slokkna í náttmyrkrinu.

²¹ Eignir, sem í upphafi voru skjótfengnar, blessast ekki að lokum.

²² Segðu ekki: „Ég hefni hins illa.“ Treystu á Drottin og hann mun bjarga þér.

²³ Tvenns konar lóð eru Drottni andstyggð og fölsuð vog er ekki góð.

²⁴ Skref mannsins eru ákveðin af Drottni. Hvernig fær þá maðurinn skilið veg sinn?

²⁵ Það er gildra að gefa helgigjöf í flýti og hyggja fyrst að eftir að heit eru unnin.

²⁶ Vitur konungur vinsar hina ranglátu úr og lætur síðan þreskihjólið ganga yfir þá.

²⁷ Andi mannsins er lampi Drottins og rannsakar hvern afkima hjarta hans.

²⁸ Mildi og sannleikur vernda konunginn og hann styrkir hásæti sitt með réttlæti.

²⁹ Þrek er ungs manns þokki en hærurnar prýði öldunganna.

³⁰ Sár undan svipu hreinsa burt hið illa og högg sem taka djúpt í hold.