Orðskviðirnir 2 - Biblían (2007)

Spekin, vörn gegn illu

¹ Sonur minn, ef þú hlýðir orðum mínum og geymir boðorð mín hjá þér,

² veitir spekinni athygli þína og hneigir hjarta þitt að hyggindum,

³ já, ef þú kallar á skynsemina og hrópar á hyggindin,

⁴ ef þú leitar að þeim eins og silfri og grefur eftir þeim eins og fólgnum fjársjóðum,

⁵ þá mun þér lærast að óttast Drottin og veitast þekking á Guði.

⁶ Drottinn veitir speki, af munni hans kemur þekking og hyggindi.

⁷ Hann geymir hinum ráðvöndu gæfuna og er skjöldur þeirra sem breyta grandvarlega

⁸ því að hann vakir yfir stígum réttlætisins og varðveitir veg sinna réttsýnu.

⁹ Þá skilur þú einnig hvað réttlæti er, réttur og réttsýni, skilur sérhverja braut hins góða.

¹⁰ Speki mun þá koma til hjarta þíns, og þekkingin verða sálu þinni til yndis.

¹¹ Aðgætnin mun vernda þig og hyggindin varðveita þig

¹² til þess að frelsa þig frá vegi hins illa, frá þeim mönnum sem fara með fals,

¹³ sem hverfa af leið einlægninnar og ganga á vegum myrkursins,

¹⁴ sem gamna sér við ódæði og fagna yfir illskuverkum,

¹⁵ sem fara hlykkjóttar leiðir og eru komnir á glapstigu í breytni sinni,

¹⁶ til að frelsa þig frá léttúðardrós og blíðmælgi hinnar framandi konu

¹⁷ sem hefur yfirgefið unnusta æsku sinnar og gleymt sáttmála Guðs síns,

¹⁸ húsi hennar hallar til dauðans og brautir hennar liggja niður til framliðinna,

¹⁹ þeir sem inn til hennar fara snúa ekki aftur og aldrei ná þeir aftur á lífsins stigu,

²⁰ til þess að þú gangir á vegi góðra manna og haldir þig á leið réttlátra.

²¹ Hinir hreinlyndu munu byggja landið og hinir ráðvöndu verða þar áfram.

²² En hinir ranglátu verða upprættir úr landinu og hinum svikulu verður tortímt.