Orðskviðirnir 19 - Biblían (2007)

¹ Betri er fátækur maður og ráðvandur en sá sem er flár í orðum og heimskur.

² Kapp er best með forsjá og sá hrasar sem hraðar sér.

³ Flónska mannsins eyðir efnum hans en hjarta hans kennir Drottni um.

⁴ Auður fjölgar vinum en fátækum manni bregst vinur.

⁵ Falsvotti verður ekki látið órefsað, sá sem fer með lygar kemst ekki undan.

⁶ Margir smjaðra fyrir tignarmanninum, allir eru vinir hins örláta.

⁷ Allir bræður hins snauða fyrirlíta hann, hve miklu fremur forðast þá vinir hans hann.

⁸ Sá sem öðlast skilning vinnur sér mest gagn, sá sem ann skynseminni hlýtur hamingju.

⁹ Falsvotti verður ekki látið órefsað og sá sem fer með lygar tortímist.

¹⁰ Sællífi hæfir ekki heimskum manni, hvað þá þræli að drottna yfir höfðingjum.

¹¹ Það er viska að vera seinn til reiði og sæmd að láta rangsleitni ekki á sig fá.

¹² Reiði konungs er eins og ljónsöskur en hylli hans sem dögg á grasi.

¹³ Heimskur sonur steypir föður sínum í glötun, konuþras er sem sífelldur þakleki.

¹⁴ Hús og auður er arfur frá feðrunum en hyggin kona er gjöf frá Drottni.

¹⁵ Letin svæfir þungum svefni og iðjuleysingjann mun hungra.

¹⁶ Sá sem hlýðir lögmálinu varðveitir líf sitt en sá deyr sem ekki hefur gát á vegum sínum.

¹⁷ Sá lánar Drottni sem líknar fátækum, hann mun endurgjalda honum.

¹⁸ Agaðu son þinn meðan enn er von, gættu þess að gera ekki út af við hann.

¹⁹ Hinn skapbráði mun hljóta refsingu, reynir þú að bjarga honum gerir þú illt verra.

²⁰ Hlýddu ráðum og taktu umvöndun svo að þú verðir vitur að lokum.

²¹ Mörg er ráðagerð mannshjartans en áform Drottins standa.

²² Maðurinn þráir miskunnarverk og betri er fátækur maður en lygari.

²³ Að óttast Drottin leiðir til lífs, þá hvílast menn mettir og óhultir.

²⁴ Latur maður dýfir hendinni ofan í skálina en nennir ekki að bera hana upp að munni sér.

²⁵ Sláir þú spottarann verður hinn fávísi hygginn, sé vandað um við skynsaman mann vex hann að viti.

²⁶ Sá sem misþyrmir föður sínum og rekur burt móður sína, sá sonur fremur smán og óhæfu.

²⁷ Sonur minn, hættu að hlýða á umvöndun og þú fjarlægist orð þekkingarinnar.

²⁸ Gagnslaust vitni hæðir réttinn og illkvittni býr í munni ranglátra.

²⁹ Spottarar eiga refsingar í vændum og bök heimskingjanna verða barin.