Orðskviðirnir 18 - Biblían (2007)

¹ Sérlyndur maður fer að eigin geðþótta og hafnar hverju hollráði.

² Heimskinginn keppir ekki að hyggindum heldur að gera skoðanir sínar kunnar.

³ Komi illmennið kemur háðungin einnig og smáninni fylgir skömm.

⁴ Djúp vötn eru orð af manns munni, lind viskunnar er sem rennandi lækur.

⁵ Það er ekki rétt að draga taum hins rangláta og halla rétti hins saklausa í dómi.

⁶ Orð heimskingjans valda deilum, munnur hans býður höggunum heim.

⁷ Munnur heimskingjans verður honum að falli og varirnar eru lífi hans snara.

⁸ Sæt eru orð rógberans, þau ná til innstu fylgsna mannsins.

⁹ Kærulaus verkmaður er albróðir niðurrifsmannsins.

¹⁰ Nafn Drottins er sterkur turn, þangað hleypur hinn réttláti og er óhultur.

¹¹ Auður ríks manns er honum öflugt vígi og ókleifur múrveggur að hans hyggju.

¹² Dramb hjartans er undanfari falls, hógværð er undanfari sæmdar.

¹³ Svari einhver áður en hann hlustar er það heimska hans og skömm.

¹⁴ Kjarkur styrkir menn í sjúkleika en hver fær borið dapurt geð?

¹⁵ Hjarta hins hyggna aflar sér þekkingar og eyra hinna vitru leitar þekkingar.

¹⁶ Gjöf greiðir þeim veg sem gefur og leiðir hann fram fyrir stórmenni.

¹⁷ Sá er fyrst flytur mál sitt virðist hafa á réttu að standa uns andstæðingurinn vefengir rök hans.

¹⁸ Hlutkestið bindur enda á deilu og sker úr málum hinna voldugu.

¹⁹ Hlunnfarinn bróðir er sem rammbyggt virki, deilur sem slagbrandar fyrir hallardyrum.

²⁰ Af ávexti munnsins mettast kviðurinn, uppskera varanna seður manninn.

²¹ Dauði og líf eru á valdi tungunnar, sá sem henni beitir mun og þiggja ávöxt hennar.

²² Sá sem eignast konu eignast gersemi og hlýtur náðargjöf frá Drottni.

²³ Hinn fátæki biður í auðmýkt en hinn ríki svarar með hörku.

²⁴ Til eru vinir sem bregðast og til er sá vinur sem reynist tryggari en bróðir.