Orðskviðirnir 16 - Biblían (2007)

¹ Fyrirætlanir hjartans eru á mannsins valdi en svar tungunnar kemur frá Drottni.

² Maðurinn telur alla vegu sína vammlausa en Drottinn reynir ásetning hans.

³ Fel Drottni verk þín og þá bera áform þín árangur.

⁴ Allt hefur Drottinn skapað í ákveðnum tilgangi, eins hinn rangláta vegna óheilladagsins.

⁵ Sérhver hrokagikkur er Drottni andstyggð, vissulega sleppur hann ekki við refsingu.

⁶ Misgjörðir afplána menn með tryggð og vináttu, að óttast Drottin forðar frá illu.

⁷ Ef Drottni geðjast breytni manns snýr hann jafnvel óvinum hans til liðs við hann.

⁸ Betra er lítið með réttu en mikill arður með röngu.

⁹ Hjarta mannsins velur leið hans en Drottinn stýrir skrefum hans.

¹⁰ Goðsvar er á vörum konungsins, í dómi skeikar honum ekki.

¹¹ Rétt vog og reisla koma frá Drottni og lóðin á vogarskálunum eru hans verk.

¹² Ranglætisverk eru konungum andstyggð því að hásætið er reist á réttlæti.

¹³ Sannleiksorð eru yndi konunga, hinn hreinskilni fellur þeim í geð.

¹⁴ Konungsreiði er fyrirboði dauðans en vitur maður sefar hana.

¹⁵ Í brosi konungs felst líf og hylli hans er sem regnský á vori.

¹⁶ Hve miklu betra er að afla sér visku en gulls og ágætara að afla sér skynsemi en silfurs.

¹⁷ Háttur hreinskilinna er að forðast illt, líf sitt varðveitir sá sem gætir breytni sinnar.

¹⁸ Dramb er falli næst, hroki veit á hrun.

¹⁹ Betra er að vera hógvær með lítillátum en deila feng með dramblátum.

²⁰ Vel farnast þeim sem vel rækir erindi sitt og sæll er sá sem treystir Drottni.

²¹ Hinn vitri leitar ráða spekinga og vel mælt orð eykur fræðslu.

²² Skynsemin er lífslind þeim sem hana á en heimskan er refsing heimskra.

²³ Hjarta spekingsins ræður orðum hans og eykur fræðsluna á vörum hans.

²⁴ Vingjarnleg orð eru hunang, sæt fyrir góminn, lækning fyrir beinin.

²⁵ Margur vegur virðist greiðfær en reynist þó heljarslóð.

²⁶ Hungur erfiðismannsins knýr hann til verka því að sulturinn rekur á eftir honum.

²⁷ Varmennið bruggar vélráð, orð hans eru sem brennandi eldur.

²⁸ Vélráður maður kveikir illdeilur og rógberinn veldur vinaskilnaði.

²⁹ Ofbeldismaðurinn ginnir náunga sinn og leiðir hann í ófæru.

³⁰ Hálflukt augu vitna um ill áform, herptar varir um unnið ódæði.

³¹ Gráar hærur eru heiðurskóróna, á vegi réttlætis öðlast menn hana.

³² Sá sem er seinn til reiði er betri en kappi og sá sem stjórnar geði sínu er meiri en sá sem vinnur borgir.

³³ Í skikkjufellingu eru teningarnir hristir en Drottinn ræður hvað upp kemur.