Orðskviðirnir 15 - Biblían (2007)

¹ Mildilegt svar stöðvar bræði en fúkyrði vekja reiði.

² Af tungu hinna vitru drýpur þekking, af munni heimskingjanna streymir flónskan.

³ Augu Drottins eru alls staðar og vaka yfir vondum og góðum.

⁴ Hógværð tungunnar er lífstré en fals hennar veldur hugarkvöl.

⁵ Afglapinn smáir leiðsögn föður síns en sá sem tekur umvöndun verður hygginn.

⁶ Í húsi hins réttláta er mikill auður en í gróða hins rangláta er óreiða.

⁷ Varir hinna vitru dreifa þekkingu en hjarta heimskingjanna fer villt vegar.

⁸ Fórn ranglátra er Drottni andstyggð en bæn réttsýnna er honum þóknanleg.

⁹ Vegur hins rangláta er Drottni andstyggilegur en þann sem ástundar réttlæti elskar hann.

¹⁰ Vægðarlaus hirting bíður þess sem hverfur af réttri leið, sá sem hatar umvöndun hlýtur að deyja.

¹¹ Dánarheimur og undirdjúpin eru Drottni auðsæ, hve miklu fremur hjörtu mannanna.

¹² Spottaranum hugnast ekki fortölur, til viturra manna leitar hann ekki.

¹³ Glatt hjarta gerir andlitið hýrlegt en sé hryggð í hjarta er hugurinn dapur.

¹⁴ Hjarta hins vitra leitar að þekkingu en heimskinginn gæðir sér á fíflsku.

¹⁵ Fátæklingurinn lítur aldrei glaðan dag en sá sem vel liggur á er sífellt í veislu.

¹⁶ Betra er að eiga lítið og óttast Drottin en mikinn fjársjóð með áhyggjum.

¹⁷ Betri er einn skammtur kálmetis með kærleika en alinaut með hatri.

¹⁸ Bráðlyndur maður vekur deilur en sá sem seinn er til reiði stillir þrætur.

¹⁹ Vegur letingjans er eins og þyrnigerði en gata trúmennskunnar sem rudd braut.

²⁰ Vitur sonur gleður föður sinn en heimskinginn fyrirlítur móður sína.

²¹ Heimskingjanum er fíflskan gleði en skynsamur maður gengur beinar brautir.

²² Áform verða að engu þar sem engin er ráðagerðin en ef margir leggja á ráðin rætast þau.

²³ Sá fagnar sem svara kann og fagurt er orð í tíma talað.

²⁴ Leið lífsins liggur upp á við fyrir hinn hyggna til þess að hann lendi ekki niðri í helju.

²⁵ Drottinn rífur niður hús hrokagikksins en setur föst landamerki ekkjunnar.

²⁶ Ill áform eru Drottni andstyggð en hrein eru vingjarnleg orð.

²⁷ Sá spillir heimilishögum sínum sem girnist rangfenginn gróða en sá lifir lengi sem hatar mútugjafir.

²⁸ Hjarta hins réttláta íhugar hverju svara skuli en munnur ranglátra eys úr sér illsku.

²⁹ Drottinn er fjarlægur ranglátum en bæn réttlátra heyrir hann.

³⁰ Vingjarnlegt augnaráð gleður hjartað, góð frétt eykur holdi á bein.

³¹ Sá sem hlýðir á holla umvöndun mun búa meðal hinna vitru.

³² Sá sem hafnar leiðsögn lítilsvirðir sjálfan sig en sá sem hlýðir á umvöndun eykur skynsemi sína.

³³ Að óttast Drottin er leiðsögn til visku, hógværð er undanfari sæmdar.