Orðskviðirnir 12 - Biblían (2007)

¹ Sá sem elskar aga elskar þekkingu en sá sem hatar umvöndun er heimskur.

² Hinn góði hlýtur velþóknun Drottins en meinfýsinn mann fyrirdæmir hann.

³ Ranglætið veitir engum fótfestu en réttlætið stendur djúpum rótum.

⁴ Væn kona er kóróna manns síns en vond kona er sem rotnun í beinum hans.

⁵ Réttlátir hyggja á réttlæti en ranglátir hafa svik í huga.

⁶ Orð ranglátra eru banvæn en tunga hinna réttsýnu frelsar þá.

⁷ Ranglátir kollsteypast og hverfa en hús réttlátra stendur.

⁸ Af vitsmunum sínum hlýtur maðurinn lof en hinn fláráði verður fyrirlitinn.

⁹ Betra er að vera lítils metinn og eiga þó þræl en að berast á og skorta brauð.

¹⁰ Hinn réttláti annast búfé sitt vel en harðneskja er í hjarta ranglátra.

¹¹ Sá sem yrkir land sitt mettast af brauði en sá sem sækist eftir hégóma er heimskur.

¹² Hinn rangláti girnist illan feng en hinn réttláti á sér trygga staðfestu.

¹³ Yfirsjón varanna er ill snara en hinn réttláti bjargast úr nauðum.

¹⁴ Ávextir varanna metta mann gæðum og af handaverkum sínum hlýtur hann umbun.

¹⁵ Heimskingi telur sig breyta rétt en vitur maður þiggur ráð.

¹⁶ Bræði afglapans birtist strax, greindur maður dylur gremju sína.

¹⁷ Sannsögult vitni mælir það sem rétt er en falsvotturinn svik.

¹⁸ Vanhugsuð orð eru sem sverðalög en tunga hins vitra græðir.

¹⁹ Sönn orð standa að eilífu en lygimál aðeins skamma hríð.

²⁰ Svik eru í hjarta hins meinfýsna en sá gleðst sem stuðlar að friði.

²¹ Hins réttláta bíður ekkert böl en ógæfan hleðst á hinn rangláta.

²² Lygarar eru Drottni andstyggð en hinir sannorðu eru yndi hans.

²³ Vitur maður dylur þekkingu sína en heimskinginn flíkar flónsku sinni.

²⁴ Hönd hinna iðnu mun drottna en hangandi hönd á erfiði í vændum.

²⁵ Hugsýki íþyngir hjartanu, eitt vingjarnlegt orð gleður það.

²⁶ Hinn réttláti vísar öðrum veginn en vegur ranglátra leiðir þá í villu.

²⁷ Letin nær ekki bráðinni en iðnin er dýrmætur auður.

²⁸ Á vegi réttlætisins er líf en glæpaleiðin liggur í dauðann.