Orðskviðirnir 11 - Biblían (2007)

¹ Svikin vog er Drottni andstyggð en rétt vog er honum geðfelld.

² Komi hroki kemur og smán en hjá hinum hógværu er viska.

³ Ráðvendni hreinskilinna leiðir þá en undirferli lygarans tortímir honum.

⁴ Lítt gagna auðæfi á degi reiðinnar en réttlæti frelsar frá dauða.

⁵ Réttlæti hins ráðvanda gerir veg hans sléttan en hinn rangláti hrasar um eigin illsku.

⁶ Réttlæti hinna hreinskilnu frelsar þá en lygarar ánetjast eigin græðgi.

⁷ Í dauðanum brestur von hins rangláta og væntingar illvirkjans bregðast.

⁸ Hinn réttláti frelsast úr nauðum, hinn rangláti kemur í hans stað.

⁹ Með orðum tortímir hinn rangláti náunga sínum en þekking hinna réttlátu bjargar þeim.

¹⁰ Borgin fagnar gæfu réttlátra og þegar ranglátir menn farast gjalla gleðióp.

¹¹ Blessun hinna réttsýnu reisir borgina en orð ranglátra steypa henni.

¹² Óvitur maður sýnir náunga sínum fyrirlitningu en vitur maður þegir.

¹³ Rógberinn ljóstrar upp leyndarmáli en hinn þagmælski virðir trúnað.

¹⁴ Án stjórnar tortímist herinn en séu ráðgjafar margir getur allt farið vel.

¹⁵ Illa fer fyrir þeim sem gengur í ábyrgð fyrir annan mann, sá sem forðast handsöl er óhultur.

¹⁶ Yndisleg kona hlýtur sæmd, hinn ötuli hlýtur auð.

¹⁷ Kærleiksríkur maður vinnur sjálfum sér gagn, harðlyndur maður vinnur sér mein.

¹⁸ Hinn rangláti eignast sýndarávinning en sá sem réttlæti sáir hlýtur ósvikin laun.

¹⁹ Að stunda réttlæti leiðir til lífs, að elta hið illa leiðir til dauða.

²⁰ Fláráðir eru Drottni andstyggð en hinir vammlausu yndi hans.

²¹ Víst er að hinn illi sleppur ekki við refsingu en hinir réttlátu eru óhultir.

²² Eins og gullhringur í svínstrýni er fríð kona sem enga háttvísi kann.

²³ Óskir hinna réttlátu leiða aðeins til góðs en vonir ranglátra kalla yfir sig reiðidóm.

²⁴ Einn miðlar öðrum af örlæti og eignast æ meira, annar heldur í meira en rétt er og verður þó enn snauðari.

²⁵ Örlátur maður hlýtur ríkulega umbun og sá sem gefur öðrum að drekka fær þorsta sínum svalað.

²⁶ Fólkið formælir þeim sem heldur í kornið en blessun kemur yfir þann sem býður það falt.

²⁷ Sá sem leitar góðs leitar velþóknunar en sá sem sækist eftir illu verður fyrir því.

²⁸ Sá fellur sem treystir á auð sinn en hinir réttlátu þrífast sem trjálauf.

²⁹ Sá sem spillir heimili sínu mun erfa vindinn en heimskinginn verður þræll hins vitra.

³⁰ Ávöxtur réttlætisins er lífstré og hinn vitri eignast hylli manna.

³¹ Fái hinn réttláti endurgjald hér á jörðu, hvað þá um hinn rangláta og syndarann?