Orðskviðirnir 10 - Biblían (2007)

Safn spakmæla

¹ Orðskviðir Salómons: Vitur sonur gleður föður sinn en heimskur sonur er móður sinni til mæðu.

² Rangfenginn auður stoðar ekki en réttlæti frelsar frá dauða.

³ Drottinn lætur ekki réttlátan mann þola hungur en kröfum hinna ranglátu hafnar hann.

⁴ Iðjuleysi færir örbirgð en auðs aflar iðin hönd.

⁵ Hygginn er sá er safnar á sumri en illa fer þeim sem sefur af sér uppskeruna.

⁶ Blessun hvílir yfir höfði hins réttláta en lögleysan hylst í munni hins illa.

⁷ Minning hins réttláta verður blessuð en nafn óguðlegra tærist burt.

⁸ Sá sem er vitur í hjarta þýðist áminningar en þeim farnast illa sem talar af gáleysi.

⁹ Sá sem fer rétta vegu gengur óhultur en upp kemst um þann sem þræðir hlykkjóttan veg.

¹⁰ Sá sem deplar auga veldur sárindum en sá sem finnur að af hreinskilni stillir til friðar.

¹¹ Lífslind er munnur réttláts manns en lögleysan hylst í munni hins illa.

¹² Hatur vekur illdeilur en kærleikurinn breiðir yfir alla bresti.

¹³ Viska er á vörum hyggins manns en á baki hins óvitra dynur vöndurinn.

¹⁴ Vitrir menn geyma þekkingu sína en orð afglapans boða bráða glötun.

¹⁵ Auður ríks manns er honum öflugt vígi en fátækt hinna snauðu verður þeim að falli.

¹⁶ Eljusemi hins réttláta verður til lífs en gróði hins rangláta til syndar.

¹⁷ Sá fer leið lífsins sem hlítir leiðsögn en sá villist af leið sem hafnar umvöndun.

¹⁸ Sá sem leynir hatri er hræsnari, sá sem dreifir hviksögum er heimskingi.

¹⁹ Málæðinu fylgja yfirsjónir en sá breytir hyggilega sem hefur taumhald á tungu sinni.

²⁰ Tunga hins réttláta er hreint silfur, vit hins óguðlega er lítils virði.

²¹ Orð hins réttláta eru margra framfæri en afglaparnir deyja úr fákænsku.

²² Blessun Drottins auðgar og erfiði mannsins bætir engu við hana.

²³ Heimskingjanum er ósóminn ánægja en viskan er hyggnum manni gleði.

²⁴ Það sem hinn óguðlegi óttast kemur yfir hann en réttlátum verður að von sinni.

²⁵ Stormur feykir burt hinum rangláta en hinn réttláti stendur á ævarandi grunni.

²⁶ Það sem tönnunum er vínsýra og augunum reykur, það er letinginn þeim sem fela honum erindi.

²⁷ Ótti Drottins lengir lífdagana en æviár ranglátra verða stytt.

²⁸ Eftirvænting réttlátra endar í gleði en vonir ranglátra rætast ekki.

²⁹ Vegur Drottins er athvarf vammlausum en illvirkjum tortíming.

³⁰ Hinum réttláta verður ekki þokað og hinir óguðlegu munu ekki byggja landið.

³¹ Af munni hins réttláta streymir viska en lygatungan verður skorin burt.

³² Varir hins réttláta vita hvað geðfellt er en munnur óguðlegra er flærðin ein.