Míka 6 - Biblían (2007)

Guð ákærir

¹ Heyrið það sem Drottinn segir: Flyt fjöllunum mál þitt, lát hæðirnar heyra raust þína.

² Fjöll, hlýðið á kæru Drottins, leggið við hlustir, undirstöður jarðarinnar, því að Drottinn flytur mál gegn þjóð sinni, lætur Ísrael svara til saka:

³ Þjóð mín, hvaða rangindum hef ég beitt þig? Og hvaða harðneskju hef ég sýnt? Svara mér því.

⁴ Ég leiddi þig út úr Egyptalandi, leysti þig úr þrælahúsinu. Ég sendi Móse, Aron og Mirjam til að fara fyrir þér.

⁵ Minnstu þess, þjóð mín, sem Balak Móabskonungur vélaði gegn þér og svaranna sem Bíleam Beórsson veitti honum. Minnstu fararinnar frá Sittím til Gilgal. Þá skilurðu réttlætisverk Drottins.

⁶ Hvað á ég að koma með fram fyrir Drottin, fram fyrir Guð á hæðum? Á ég að koma fram fyrir hann með brennifórnir, með veturgamla kálfa?

⁷ Hefur Drottinn þóknun á þúsundum hrúta og tugþúsundum lækja af ólífuolíu? Á ég að fórna frumburði mínum fyrir synd mína, ávexti kviðar míns fyrir misgjörðir mínar?

⁸ Maður, þér hefur verið sagt hvað gott er og hvers Drottinn væntir af þér: þess eins að þú gerir rétt, ástundir kærleika og þjónir Guði í hógværð.

Refsað fyrir svik og ofríki

⁹ Drottinn hrópar til borgarinnar og vitur er sá sem óttast nafn hans: Heyrið þetta, kynstofn og borgarsamkunda.

¹⁰ Get ég látið bat-mæli hins guðlausa óátalinn eða hinn nauma efu-mæli sem ég hef fordæmt?

¹¹ Á ég að láta honum órefsað þrátt fyrir ranga vog og sekk með sviknum vogarsteinum?

¹² Auðkýfingar borgarinnar beita ofbeldi, íbúar hennar ljúga og svikul er tungan í munni þeirra.

¹³ Og nú tek ég að refsa þér og eyða þér vegna misgjörða þinna.

¹⁴ Þú munt eta en þó ekki seðjast og sulturinn mun sverfa að þér. Því sem þú hyggst forða undan færðu ekki bjargað, og það sem þú bjargar ofursel ég sverði.

¹⁵ Þú munt sá en ekki uppskera, troða ólífur en ekki smyrja þig olíu, troða vínþróna en ekki drekka vínið.

¹⁶ Þú hefur farið að lögum Omrís og háttum Akabs ættar, líferni þeirra hafið þér tamið yður. Því legg ég borgina í auðn og geri íbúa hennar að athlægi. Þér munuð baka yður fyrirlitningu þjóðar minnar.