Míka 5 - Biblían (2007)

Friðarhöfðinginn frá Betlehem

¹ En þú, Betlehem í Efrata, ein minnsta ættborgin í Júda, frá þér læt ég þann koma er drottna skal í Ísrael. Ævafornt er ætterni hans, frá ómunatíð.

² Því verður þjóðin yfirgefin þar til sú hefur fætt er fæða skal. Þá munu þeir sem eftir lifa ættmenna hans snúa aftur til Ísraels lýðs.

³ Hann mun standa sem hirðir þeirra í krafti Drottins, í mætti nafns Drottins, Guðs síns, og þeir óhultir verða. Þá munu menn mikla hann allt til endimarka jarðar.

⁴ Hann mun tryggja friðinn. Ráðist Assýringar inn í land vort og brjótist inn í virkin teflum vér gegn þeim sjö hirðum og átta smurðum leiðtogum.

⁵ Þeir munu vaka yfir landi Assýringa með sverð í hendi og með sveðju yfir landi Nimrods. Hann mun frelsa oss undan Assýringum vaði þeir yfir jörð vora og fótumtroði lendurnar.

Þeir sem eftir verða

⁶ Þeir sem eftir verða af Jakobs ætt meðal hinna mörgu þjóða verða sem dögg frá Drottni, gróðrarskúr á grasi. Þeir vænta einskis af neinum og binda ekki vonir við mannanna börn.

⁷ Þeir sem eftir verða af Jakobs ætt meðal þjóðanna, meðal margra þjóðflokka, verða sem ljón á meðal skógardýra, eins og ljónshvolpar í sauðahjörð. Þeir ráðast fram og tæta í sundur og enginn fær rönd við reist.

⁸ Upp skaltu hefja arm þinn gegn andstæðingum þínum svo að öllum óvinum þínum verði tortímt.

Landið hreinsað

⁹ Á þeim degi, segir Drottinn, eyði ég öllum hestum sem þú átt og brýt stríðsvagna þína.

¹⁰ Ég legg í eyði borgir lands þíns og brýt öll varnarvirki þín.

¹¹ Ég eyði galdrinum sem þú stundar og spásagnamenn skulu ekki framar vera hjá þér.

¹² Ég brýt skurðgoð þín og helgisúlur. Þú skalt ekki framar tilbiðja verk þinna eigin handa.

¹³ Ég ríf niður Asérur þínar og eyði borgum þínum.

¹⁴ Af heift og reiði hegni ég þjóðum sem hafa óhlýðnast.