Míka 3 - Biblían (2007)

Gegn leiðtogum þjóðarinnar

¹ Ég sagði: Heyrið, höfðingjar Jakobs og leiðtogar Ísraels ættar. Vissulega áttuð þér að vita hvað rétt er.

² En þér hatið það sem gott er og elskið það sem illt er, fláið af mönnum húðina, tætið hold af beinum þeirra.

³ Þeir eta hold þjóðar minnar, flá af skinnið og brjóta beinin, hluta holdið niður eins og kjöt í pott eða steik á pönnu.

⁴ Þeir munu hrópa til Drottins en hann mun ekki svara, heldur byrgja auglit sitt fyrir þeim því að verk þeirra voru ill.

Gegn spámönnum

⁵ Svo mælir Drottinn um spámennina sem villa um fyrir þjóð minni: Fyrir matartuggu boða þeir frið en stríð hverjum þeim sem engu stingur upp í þá.

⁶ Þess vegna mun nótt koma yfir yður en engar vitranir, myrkur en engir spádómar. Sól spámannanna mun setjast og dagar myrkvast.

⁷ Sjáendur verða sér til minnkunar og spásagnamenn hafðir að spotti. Allir munu þeir hylja andlit sitt því að Guð veitir þeim engin svör.

⁸ En mér hefur andi Drottins veitt fullan þrótt, réttsýni og hugrekki til að átelja Jakob fyrir brot hans og Ísrael fyrir synd hans.

Gegn mútuþægum leiðtogum og prestum

⁹ Heyrið þetta, leiðtogar Jakobs ættar, höfðingjar Ísraels ættar, þér sem hafið andstyggð á réttlæti og hallið hverju því sem rétt er,

¹⁰ þér sem byggið Síon með blóði og Jerúsalem með ódæðisverkum

¹¹ Höfðingjar hennar þiggja mútur fyrir dóma sína, prestar hennar fé fyrir ráð sín og spámenn hennar spá gegn gjaldi. Þó reiða þeir sig á Drottin og segja: „Er Drottinn ekki með oss? Engin ógæfa hendir oss.“

¹² Af yðar sökum verður Síon plægð sem akur, Jerúsalem verður að rúst og musterisfjallið að kjarrivaxinni hæð.