Jónas 2 - Biblían (2007)

Jónas syngur þakkarsálm

¹ Drottinn sendi stóran fisk og lét hann gleypa Jónas og var Jónas í kviði fisksins í þrjá daga og þrjár nætur.

² Úr kviði fisksins bað hann til Drottins, Guðs síns:

³ Í neyð minni kallaði ég til Drottins og hann svaraði mér. Úr djúpi heljar hrópaði ég á hjálp og þú heyrðir hróp mitt.

⁴ Þú varpaðir mér niður á hyldýpi á reginhafi, straumþunginn umlukti mig, allar bylgjur þínar og boðaföll gengu yfir mig.

⁵ Þá hugsaði ég: Ég er burt rekinn frá augum þínum. Samt mun ég enn fá að líta þitt heilaga musteri.

⁶ Vötnin ætluðu að drekkja mér, hyldýpið umlukti mig og þangið vafðist mér um höfuð.

⁷ Ég steig niður að rótum fjallanna og slagbrandar jarðarinnar skullu aftur að baki mér að eilífu. En þú leiddir mig lifandi upp úr glötunargröfinni, Drottinn Guð minn.

⁸ Er ég var að dauða kominn minntist ég Drottins og bæn mín kom fram fyrir þig í þínu heilaga musteri.

⁹ Þeir sem dýrka fánýta hjáguði hafa brugðið trúnaði við Drottin.

¹⁰ En ég vil færa þér fórn og syngja þér þakkarsálm. Heitið, sem ég hef unnið, vil ég efna. Hjálpin er hjá Drottni.

¹¹ Þá bauð Drottinn fiskinum að spúa Jónasi upp á þurrt land.