Jóel 4 - Biblían (2007)

Þjóðirnar dæmdar

¹ Á þeim tíma og á þeim dögum er ég rétti hag Júda og Jerúsalem

² safna ég saman öllum þjóðum og stefni þeim niður í Jósafatsdal. Og þar sæki ég þær til saka vegna lýðs míns og arfleifðar Ísraels því að þær hafa tvístrað henni meðal þjóðanna og hlutað sundur land mitt.

³ Þeir hafa varpað hlutkesti um þjóð mína, látið pilt fyrir skækju og ungmey fyrir vínið sem þeir drukku.

⁴ Hvað viljið þér mér, Týrus, Sídon og öll Filisteahéruð? Hyggið þér á málagjöld einhvers sem ég hef gert yður? Hyggist þér endurgjalda mér? Skjótt og sviplega læt ég þá verk yðar koma yður í koll.

⁵ Þér hafið rænt silfri mínu og gulli og fært ágætustu gersemar mínar í hof yðar.

⁶ Júdamenn og Jerúsalembúa hafið þér selt Grikkjum þannig að þeir fluttust langt burt frá átthögum sínum.

⁷ En ég kalla þá burt þaðan sem þér selduð þá, og verk yðar munu hitta sjálfa yður fyrir.

⁸ Syni yðar og dætur sel ég Júdamönnum. Þeir munu aftur selja þau Sabamönnum, fjarlægri þjóð, því að svo hefur Drottinn mælt.

⁹ Boðið þetta meðal þjóðanna: Búið yður til stríðs. Kallið út kempurnar. Allir stríðsmenn komi fram og búist til hernaðar.

¹⁰ Smíðið sverð úr plógjárnum yðar og spjót úr sniðlum yðar. Hver vesalingur hrópi: „Ég er garpur.“

¹¹ Skundið af stað, komið hvaðanæva, allar þjóðir. Safnist þar saman. Drottinn, sendu niður kappa þína þangað.

¹² Þjóðirnar skulu halda í flýti upp til Jósafatsdals. Þar sest ég í dómarasæti yfir grannþjóðunum öllum.

¹³ Bregðið sigðinni, vínberin eru fullþroskuð. Komið og troðið. Svo full er vínþróin að lagarkerin flóa yfir. Svo mikil er illska þeirra.

¹⁴ Mannþröng, mannsægur í Dal dómsins. Nálægur er dagur Drottins í Dal dómsins.

Dagur Drottins

¹⁵ Sól og tungl myrkvast og stjörnurnar synja um birtu sína.

¹⁶ En Drottinn þrumar frá Síon og hefur upp raust sína frá Jerúsalem svo að himinn og jörð nötra. En lýð sínum veitir Drottinn skjól og Ísraelsmönnum er hann athvarf.

¹⁷ Og yður verður ljóst að ég, Drottinn, Guð yðar, bý á Síon, hinu heilaga fjalli mínu. Jerúsalem verður heilög, aðkomumenn munu aldrei framar ryðjast þar í gegn.

¹⁸ Á þeim degi drýpur vínlögur af fjöllunum, hæðirnar fljóta í mjólk og vatn mun streyma um alla farvegi í Júda. Og lind mun streyma frá húsi Drottins og fylla farveg Akasíudalsins.

Endurlausn Júda

¹⁹ Egyptaland verður að auðn og Edóm að mannlausum öræfum vegna ofbeldisins gegn Júdamönnum. Í landi þeirra úthelltu þeir saklausu blóði.

²⁰ En Júda verður byggð að eilífu og Jerúsalem um aldir alda.

²¹ Saklaust mun ég telja það blóð sem ég mat áður til blóðsakar. Og Drottinn mun dveljast um kyrrt á Síon.