Jeremía 45 - Biblían (2007)

Huggunarorð til Barúks

¹ Þennan boðskap flutti Jeremía spámaður Barúk Neríasyni þegar hann var að skrifa þessar ræður á bók eftir Jeremía, á fjórða stjórnarári Jójakíms Jósíasonar Júdakonungs:

² Svo segir Drottinn, Guð Ísraels, um þig, Barúk:

³ Þú hefur sagt: Vei mér því að Drottinn bætir kvíða við kvöl mína. Ég er orðinn örmagna af andvörpum mínum og finn enga hvíld.

⁴ Því skaltu segja við hann: Svo segir Drottinn: Ég mun brjóta niður það sem ég hef byggt, ég mun uppræta það sem ég hef gróðursett um allt land.

⁵ Ætlarðu þér mikinn hlut? Láttu af því. Sjá, ég sendi ógæfu yfir allt dauðlegt, segir Drottinn. En þér mun ég gefa líf þitt að herfangi hvert sem þú ferð.