Harmljóðin 3 - Biblían (2007)

Hegning, iðrun, von

¹ Ég er maðurinn sem hefur þjáðst undir reiðisvipu hans.

² Mig hefur hann hrakið burt, út í myrkur og niðdimmu.

³ Gegn mér snýr hann hendi sinni án afláts allan daginn.

⁴ Hann hefur tálgað af mér hold og hörund og mulið bein mín.

⁵ Beiskju og mæðu hefur hann hlaðið upp í kringum mig,

⁶ hneppt mig í myrkur eins og þá sem dánir eru fyrir löngu.

⁷ Hann hefur múrað mig inni svo að ég kemst ekki út, lagt á mig þunga fjötra.

⁸ Þótt ég hrópi og kalli á hjálp hafnar hann bæn minni.

⁹ Hann hefur lokað vegum mínum með höggnum steinum, gert stigu mína torfæra.

¹⁰ Hann sat um mig eins og björn um bráð, eins og ljón í launsátri.

¹¹ Hann leiddi mig afvega og tætti mig sundur, hann gerði út af við mig.

¹² Hann spennti boga sinn og stillti mér upp sem skotmarki fyrir örina.

¹³ Hann nísti nýru mín með sonum örvamælis síns.

¹⁴ Ég varð allri þjóð minni að athlægi, hún syngur um mig háðkvæði liðlangan daginn.

¹⁵ Hann mettaði mig beiskum jurtum, gaf mér malurt að drekka,

¹⁶ lét mig bryðja möl og þrýsti mér í duftið.

¹⁷ Þú hefur rænt mig friði, ég veit ekki lengur hvað hamingja er

¹⁸ og segi: „Allur þróttur er mér horfinn og brostin von mín til Drottins.“

¹⁹ Minnstu neyðar minnar og hrakninga, malurtarinnar og eitursins.

²⁰ Sál mín hugsar sífellt um þetta og er döpur í brjósti mér.

Miskunn Guðs varir

²¹ En þetta vil ég hugfesta og þess vegna vona ég:

²² Náð Drottins er ekki þrotin, miskunn hans ekki á enda,

²³ hún er ný á hverjum morgni, mikil er trúfesti þín.

²⁴ Drottinn er hlutdeild mín, segir sál mín, þess vegna vona ég á hann.

²⁵ Góður er Drottinn þeim er á hann vona og þeim manni er til hans leitar.

²⁶ Gott er að bíða hljóður eftir hjálp Drottins.

²⁷ Gott er fyrir manninn að bera ok í æsku.

²⁸ Hann sitji einn og hljóður þegar Drottinn hefur lagt það á hann.

²⁹ Hann liggi með munninn við jörðu, vera má að enn sé von,

³⁰ hann bjóði þeim vangann sem slær hann, láti metta sig smán.

³¹ Því að ekki útskúfar Drottinn um alla eilífð.

³² Þótt hann valdi harmi, miskunnar hann af mikilli náð sinni.

³³ Því að viljandi hrjáir hann ekki né hrellir mannanna börn.

³⁴ Að troða undir fótum alla bandingja landsins,

³⁵ að halla rétti manns fyrir augliti Hins hæsta,

³⁶ að beita mann ranglæti í máli hans, skyldi Drottinn ekki sjá það?

³⁷ Hver er sá sem bauð og það varð án þess að Drottinn hafi ákveðið það?

³⁸ Gengur ekki fram af munni Hins hæsta bæði gæfa og ógæfa?

³⁹ Hví skyldi nokkur lifandi maður kvarta sem refsað er fyrir syndir sínar?

⁴⁰ Rannsökum breytni vora og prófum og snúum aftur til Drottins.

⁴¹ Fórnum hjarta og höndum til Guðs í himninum.

⁴² Vér höfum syndgað og verið óhlýðnir, þú hefur ekki fyrirgefið,

⁴³ þú sveipaðir þig reiði, ofsóttir oss og deyddir vægðarlaust.

⁴⁴ Þú sveipaðir þig skýi svo að engin bæn kemst í gegn.

⁴⁵ Þú gerðir oss að skarni og sorpi á meðal þjóðanna.

⁴⁶ Allir óvinir vorir glenntu upp ginið.

⁴⁷ Geigur og gildra urðu hlutskipti vort, eyðing og tortíming.

⁴⁸ Táralækir streyma af augum mér því að þjóð minni er tortímt.

⁴⁹ Hvíldarlaust fljóta augu mín í tárum án þess að hlé verði á,

⁵⁰ uns Drottinn lítur niður af himnum og horfir á.

⁵¹ Það sem auga mitt lítur kvelur mig vegna allra dætra borgar minnar.

⁵² Þeir sem voru óvinir mínir án tilefnis hafa elt mig eins og fugl.

⁵³ Þeir reyndu að granda mér í gryfju og köstuðu steinum á mig.

⁵⁴ Vatn flóði yfir höfuð mitt, ég hugsaði: „Það er úti um mig.“

⁵⁵ Ég ákallaði nafn þitt, Drottinn, úr djúpi gryfjunnar.

⁵⁶ Þú heyrðir hróp mitt: „Byrg ekki eyra þitt fyrir ákalli mínu um hjálp.“

⁵⁷ Þú nálgaðist mig þegar ég hrópaði til þín, sagðir: „Óttast ekki!“

⁵⁸ Þú varðir, Drottinn, málstað minn, leystir líf mitt.

⁵⁹ Þú hefur, Drottinn, séð óréttinn sem ég er beittur, rétt þú hlut minn.

⁶⁰ Þú hefur séð hefndarþorsta þeirra, allt ráðabrugg þeirra gegn mér,

⁶¹ þú hefur heyrt háðsyrði þeirra, Drottinn, allt ráðabrugg þeirra gegn mér,

⁶² sífellt hljóðskraf andstæðinga minna og ráðagerðir þeirra gegn mér.

⁶³ Sjá þú, hvort sem þeir sitja eða standa kveða þeir háðkvæði um mig.

⁶⁴ Endurgjald þeim, Drottinn, eins og þeir hafa til unnið.

⁶⁵ Legg hulu yfir hjarta þeirra, bölvan þín komi yfir þá.

⁶⁶ Ofsæktu þá í reiði og afmá þá undan himni Drottins.