Amos 3 - Biblían (2007)

Útvalning og ábyrgð

¹ Heyrið þetta orð sem Drottinn talaði gegn yður, Ísraelsmenn, og gegn öllum þeim kynstofni sem ég leiddi út af Egyptalandi:

² Af öllum kynstofnum jarðar hef ég aðeins valið yður. Þess vegna kalla ég yður til ábyrgðar fyrir öll afbrot yðar.

³ Verða tveir menn samferða nema þeir hafi áður mælt sér mót?

⁴ Öskrar ljón í skóginum hafi það enga bráð? Grenjar ljónshvolpur í bæli sínu nema hann hafi engu náð?

⁵ Fellur fugl til jarðar hafi enginn hæft hann? Hrekkur gildra í lás á jörðinni nema eitthvað hafi í hana komið?

⁶ Verður hafurshornið þeytt í einhverri borg án þess að íbúarnir óttist? Kemur böl yfir borg hafi Drottinn ekki komið því til leiðar?

⁷ Því að Drottinn Guð gerir ekkert án þess að opinbera fyrirætlun sína fyrir þjónum sínum, spámönnunum.

⁸ Ljónið öskrar − hver óttast ekki? Drottinn Guð talar − hver spáir ekki?

Dómur yfir Samaríu

⁹ Kallið út yfir hallirnar í Asdód og hallirnar í Egyptalandi og segið: Safnist saman á fjöllunum við Samaríu og sjáið sundrungina í borginni og ofbeldið sem þar er framið.

¹⁰ Íbúarnir kunna ekki að gera það sem rétt er, hefur Drottinn sagt. Þeir safna auði í hallir sínar með ofbeldi og yfirgangi.

¹¹ Þess vegna segir Drottinn Guð: Fjandmenn munu umkringja landið, þeir munu brjóta niður varnir þínar og hallir þínar verða rændar.

¹² Svo segir Drottinn: Líkt og þegar hirðir bjargar tveimur leggjum eða snepli af eyra úr gini ljónsins munu Ísraelsmenn sem búa í Samaríu bjargast, aðeins með fótagafl af rúmi og höfðagafl af bekk.

¹³ Hlustið og vitnið um þetta gegn ætt Jakobs, segir Drottinn Guð hersveitanna:

¹⁴ Já, daginn sem ég kalla Ísraelsmenn til ábyrgðar fyrir glæpi sína mun ég senda hegninguna yfir ölturu í Betel. Altarishornin verða höggvin af, þau munu falla til jarðar.

¹⁵ Þá brýt ég niður vetrarhúsið og sumarhúsið, fílabeinshúsin verða jöfnuð við jörðu og hin stóru hús munu hverfa, segir Drottinn.