Amos 2 - Biblían (2007)

¹ Svo segir Drottinn: Vegna þriggja, já, vegna fjögurra glæpa Móabs hverf ég ekki frá þessu: Af því að íbúarnir þar brenndu bein konungsins í Edóm að kalki

² mun ég senda eld til Móabs. Hann mun gleypa hallirnar í Keríjót. Móab mun deyja í vopnagný, við heróp og lúðurhljóm.

³ Þann sem ríkir yfir Móab mun ég uppræta úr landinu og drepa alla höfðingja þess ásamt honum, hefur Drottinn sagt.

⁴ Svo segir Drottinn: Vegna þriggja, já, vegna fjögurra glæpa Júda hverf ég ekki frá þessu: Þar sem íbúarnir þar hafa hafnað lögmáli Drottins og ekki haldið boðorð hans, þar sem falsguðir þeirra, sem feður þeirra eltu, hafa leitt þá afvega

⁵ mun ég senda eld til Júda. Hann mun gleypa hallirnar í Jerúsalem.

⁶ Svo segir Drottinn: Vegna þriggja, já, vegna fjögurra glæpa Ísraels hverf ég ekki frá þessu: Þar sem íbúarnir þar hafa selt saklausa menn fyrir silfur, hinn fátæka fyrir eina ilskó,

⁷ af því að þeir traðka höfuð hins umkomulausa niður í moldina og hrekja hina varnarlausu út af veginum, af því að faðir og sonur ganga inn til sömu konu svo að þeir vanhelga mitt heilaga nafn,

⁸ af því að þeir teygja úr sér hjá hverju altari á klæðum sem tekin hafa verið að veði og drekka sektarvín í húsi Guðs síns.

⁹ Vegna þeirra tortímdi ég sjálfur Amorítum sem voru hávaxnir sem sedrustré og sterkir sem eikur, ég eyddi ávöxtum þeirra að ofanverðu og rótum þeirra að neðan.

¹⁰ Ég leiddi yður sjálfur frá Egyptalandi og gekk með yður í eyðimörkinni í fjörutíu ár svo að þér gætuð tekið land Amoríta til eignar.

¹¹ Ég upphóf nokkra af sonum yðar til að verða spámenn og ýmsa af æskumönnum yðar til að verða nasírear. Eða er ekki svo, Ísraelsmenn? hefur Drottinn Guð sagt.

¹² En þér gáfuð nasíreunum vín að drekka og sögðuð við spámennina: „Spáið ekki.“

¹³ Sjá, ég vil láta jörðina undir yður skjálfa eins og hlaðinn vagn skelfur undir kornböggum.

¹⁴ Hlauparinn kemst ekki í skjól, kraftajötunninn fær ekki neytt afls síns og kappinn ekki bjargað lífi sínu,

¹⁵ bogaskyttan nær ekki fótfestu, fæturnir bjarga ekki hinum fótfráa og riddarinn bjargar ekki lífi sínu.

¹⁶ Jafnvel kappinn hugrakki mun á þeim degi flýja nakinn, hefur Drottinn sagt.