Zephaniah 2 - Yn Vible Casherick 1775 1819

CAB. II

¹ Chaggle-jee shiu hene cooidjagh, dy jarroo chaggle-jee shiu hene cooidjagh, O ashoon dwoaiagh.

² Roish my vees y decree coyrt ayns bree, roish my jed y laa shaghey myr coau, roish my jig jymmoose y Chiarn dy trome erriu, roish my jean laa eulyssagh y Chiarn berraghtyn erriu.

³ Shir-jee yn Chiarn, ooilley shiuish ta imlee er y thalloo, ta er chooilleeney e vriwnys, shir-jee lurg ynrickys, shir-jee lurg meenid-cree: hoiggal, dy bee shiu er nyn goadey ayns laa jymmoose y Chiarn.

⁴ Son bee Gaza treigit, as Ashkelon ny hraartys: nee ad Ashdod y eebyrt magh ec y vun-laa, as bee Ekron astyrit ass ny fraueyn.

⁵ Smerg da cummaltee slystyn ny marrey, ashoon ny Cherethiteyn! ta goo yn Chiarn nyn ’oï euish: O Chanaan, cheer ny Philistinee, neem’s uss y stroie, nagh bee cummaltagh faagit aynyd.

⁶ As bee slystyn ny marrey son cummallyn as bwaneyn da bochillyn, as bwoailtchyn son shioltaneyn.

⁷ As bee ny ardjyn cheddin son fooilliagh thie Yudah, nee ad beaghey er shen: ayns thieyn Ashkelon nee ad lhie sheese ’syn astyr: son nee yn Chiarn yn Jee oc jeeaghyn orroo, as chyndaa ersooyl nyn gappeeys.

⁸ Ta mish er chlashtyn scammyltyn Voab, as oltooanyn cloan Ammon, lioroo t’ad er oltooaney my phobble, as er voggyssagh ad-hene noi yn ynnyd oc.

⁹ Shen-y-fa, myr ta mee bio, ta Chiarn ny flaunyssee, Jee Israel, dy ghra, Shickyr bee Moab myr Sodom, as cloan Ammon myr Gomorrah, dy jarroo, ooilley fo undaagagh, as nyn sloghyn sollan, as ny hraartys son dy bragh: nee fooilliagh my phobble’s ad y spooilley, as ec sluight my phobble bee ad ayns eiraght.

¹⁰ Shoh vees leagh nyn moyrn, er-yn-oyr dy vel ad er oltooaney, as er voggyssagh ad-hene noi pobble Chiarn ny flaunyssee.

¹¹ Bee yn Chiarn atchimagh daue: son ver eh naardey ooilley jeeghyn y thallooin; as nee deiney eshyn y ooashlaghey, dy chooilley unnane ’syn ynnyd hene, dy jarroo ooilley ellanyn ny ashoonee.

¹² Shiuish Ethiopianee myrgeddin, bee shiu er nyn stroie lesh my chliwe’s.

¹³ As nee eh sheeyney magh e laue noi yn twoaie, as ver eh mow Assyria: as nee eh Nineveh ny hraartys, as dy ve sponkit myr yn aasagh.

¹⁴ As nee ny shioltaneyn lhie sheese ’sy vean eck, dy chooilley cheint dy veisht: nee chammah yn choayr as y bittern goaill aaght ayns ny linteyryn mullee eck: nee yn coraa oc cauaigey ayns ny uinniagyn, bee traartys ayns ny dorryssyn: son nee eh roostey yn obbyr cedaragh.

¹⁵ Shoh yn ard-valley boggyssagh, va cummal ayns soaillid, dooyrt ayns e cree, Ta mish ayn, as cha vel unnane erbee casley rhym: kys t’ee er jeet dy ve ny traartys, ynnyd son maase dy lhie sheese ayn! nee dagh fer hed shaghey thassane ayns craid, as craa e laue urree.