Zephaniah 1 - Yn Vible Casherick 1775 1819

CAB. I

¹ Goo yn Chiarn haink gys Zephaniah mac Chushi, mac Ghedaliah, mac Amariah, mac Hizkiah, rish lhing Yosiah, mac Amon, ree Yudah.

² Neem’s dy bollagh stroie dy chooilley nhee veih’n thalloo, ta’n Chiarn dy ghra.

³ Stroie-yms dooinney as baagh: Stroie-yms eeanlee yn aer, as eeastyn ny marrey, as ceabyn snapperal ny mee-chrauee, as giare-yms jeh dooinney veih eaghtyr y thallooin, ta’n Chiarn dy ghra.

⁴ As sheeyn-yms magh myrgeddin my laue er Judah, as er ooilley cummaltee Yerusalem, as giare-yms jeh fooilliagh Vaal veih’n ynnyd shoh, as ennym ny Chemarim, marish ny saggyrtyn;

⁵ As adsyn ta cur ooashley da sheshaght rollageagh yn aer, er mullagh ny thieyn, as adsyn ta ooashlaghey, as breearrey liorish y Chiarn, as breearrey liorish Malcham;

⁶ As adsyn ta er chur cooyl rish y Chiarn, as adsyn nagh ren shirrey huggey, ny briaght er e hon.

⁷ Bee dty host ec fenish y Chiarn Jee: son ta laa yn Chiarn er-gerrey: son ta’n Chiarn er n’aarlagh oural, t’eh er chuirrey e ghoaldee.

⁸ As hig eh gy-kione, ayns laa oural y Chiarn, dy jean-yms kerraghey ny princeyn, as cloan y ree, as adsyn ooilley ta coamrit lesh eaddagh joarree.

⁹ Ayns y laa cheddin neem’s kerraghey adsyn ooilley ta lheim harrish sole y dorrys, ta lhieeney thie nyn mainshtyr lesh mee-chairys as molteyrys.

¹⁰ As hig eh gy-kione ayns y laa shen, ta’n Chiarn dy ghra, dy bee yllaghey dy cheayney veih giat ny eeastee, as gullal veih yn nah yiat, as tharmane vooar veih ny croink.

¹¹ Yllee-jee, shiuish chummaltee Vaktesh, son ta ooilley ny marchanyn giarit sheese: t’adsyn ooilley va dellal ayns argid giarit jeh.

¹² As hig eh gy-kione ec y traa shen, dy jean-yms ronsagh Jerusalem lesh cainleyn, as kerraghey ny deiney t’ec fea er nyn ghrundin; ta gra ayns nyn gree, Cha jean y Chiarn mie ny sie.

¹³ Shen-y-fa hig yn chooid oc dy ve son spooilley, as ny thieyn oc nyn dholtanyn: nee ad myrgeddin thieyn y hroggal, agh cha jean ad cummal ayndoo: as nee ad garaghyn-feeyney y hoiaghey, agh jeh’n feeyn oc cha jean ad giu.

¹⁴ Ta laa mooar y Chiarn er-gerrey, as cheet feer siyragh, dy jarroo coraa laa yn Chiarn: nee yn dooinney niartal keayney ayns shen dy sharroo.

¹⁵ Ta’n laa shen, laa dy yymmoose, laa dy hrimshey, as dy arkys, laa dy hraartys as toyrt-mow, laa dy ghorraghys as dy ghrooid, laa dy vodjallyn as dorraghys dullyr,

¹⁶ Laa da’n trumpet as larm-caggee, noi ny ard-valjyn voallit, as noi ny tooryn ard.

¹⁷ As ver-ym lhiam seaghyn er deiney, dy jean ad shooyl myr deiney doal, er-yn-oyr dy vel ad er n’yannoo peccah noi yn Chiarn: as bee yn uill oc deayrtit magh myr joan, as yn eill oc myr gaerr.

¹⁸ Chamoo oddys yn argid, ny yn airh oc sauail ad ayns laa jymmoose y Chiarn, agh bee yn slane cheer er ny choyrt mow lesh aile yn eadolys echey: son nee eh dy jarroo, dy leah geddyn rea rish ooilley cummaltee yn cheer.