Zechariah 9 - Yn Vible Casherick 1775 1819

CAB. IX

¹ Phadeyrys trome goo yn Chiarn noi cheer Hadrach, as er Damascus nee eh tannaghtyn: tra vees sooillyn dooinney, myr jeh ooilley sheelogheyn Israel er ny hyndaa gys y Chiarn.

² As noi Hamath t’er y chagliagh oc; noi Tyrus as Zidon my s’creeney ad.

³ As hrog Tyrus jee hene cashtal lajer, as hasht ee seose argid myr y joan, as airh ghlen myr laagh ny straïdyn.

⁴ Cur-my-ner nee yn Chiarn geiyrt ee magh, as bwoaillee eh yn phooar eck ayns yn aarkey, as bee ish er ny stroie lesh aile.

⁵ As nee Ashkelon fakin shoh, as aggle y ghoaill; as hee Gaza eh neesht, as bee eh feer trimshagh, as myrgeddin Ekron: son bee’n jerkal eck ayns fardail, as nee yn ree cherraghtyn veih Gaza, as bee Ashkelon gyn cummaltee.

⁶ As nee joarree cummal ayns Ashdod, as giare-ym jeh moyrn ny Philistinee.

⁷ As goym ersooyl yn uill echey ass e veeal, as e eajeeys veih eddyr e eeacklyn: agh eshyn t’er-mayrn, eer eshyn vees lesh y Jee ain, as bee eh myr kiannoort ayns Judah, as bee Ekron myr y Jebusite.

⁸ As nee’m campal mygeayrt my hie lesh sheshaght-caggee, dy endeil eshyn ta cheet as goll huggey as veih: as cha jig tranlaasagh erbee ny hrooid oc arragh: son ta mee nish er yeeaghyn orroo lesh my hooillyn.

⁹ Gow boggey mooar, O inneen Zion: trog seose dty choraa, O inneen Yerusalem: cur-my-ner, ta dty ree cheet hood: t’eh ynrick, ta saualtys echey, t’eh imlee, as markiaght er assyl, as er lhiy sharragh yn assyl.

¹⁰ As giare-ym jeh yn ainagh voish Ephraim, as y cabbyl veih Jerusalem, as bee’n bow-chaggee er ny vrishey, as loayree eh shee rish ny ashoonee: as bee yn reeriaght eer veih keayn gys keayn, as veih yn awin gys ardjyn sodjey magh y thallooin.

¹¹ As er dty hon’s myrgeddin, liorish fuill dty chonaant, ta mee er choyrt reamys da dty phryssoonee ass yn ooig, ayn nagh vel veg yn ushtey.

¹² Chyndaa-jee gys yn chashtal lajer, shiuish phryssoonee dy hreishteil, eer er y laa shoh, ta mee dy hickyraghey, dy jean-ym cooilleeney dooble dhyt.

¹³ Tra ta mee er lhoobey Judah er my hon, er lhieeney’n vhow lesh Ephraim, as er hroggal seose ny mec ayd’s, O Zion, noi dty vec’s, O Ghreece, as er n’yannoo oo myr cliwe yn treanagh:

¹⁴ As bee yn Chiarn ry-akin harrystoo, as hig e hide magh myr tendreil: as nee yn Chiarn Jee yn trumpet y heidey, as hed eh magh lesh geayghyn-cassee yn jiass.

¹⁵ Nee Chiarn ny flaunyssee ad y endeil, as nee ad stroie, as yiow ad yn varriaght lesh claghyn-sling, as iu-ee ad, as nee ad feiyr myr lesh feeyn, as bee ad er ny lhieeney myr siyn, as myr corneilyn yn altar.

¹⁶ As saue-ee yn Chiarn nyn Yee ad ayns y laa shen myr shioltane e phobble, son bee ad myr claghyn attey, er ny hroggal seose myr cowrey-caggee er y cheer echey.

¹⁷ Son cre wheesh as ta e vieys, as cre wheesh as ta e aalid! nee arroo ny deiney aegey y yannoo gennal, as feeyn noa ny mraane aegey.