Zechariah 7 - Yn Vible Casherick 1775 1819

CAB. VII

¹ As haink eh gy-kione ayns y chiarroo vleïn jeh ree Darius, dy daink goo yn Chiarn gys Zechariah ayns y chiarroo laa jeh’n nuyoo vee, eer Chisleu.

² Tra hug mee gys thie Yee Sharezer, as Regem-melech, as ny deiney oc, dy ghoaill padjer roish y Chiarn:

³ As dy loayrt rish ny saggyrtyn, va ayns thie Chiarn ny flaunyssee, as rish ny phadeyryn, gra, Vel eh orrin dy ghobberan ayns y wheiggoo vee, freayll trostey, myr ta shin er n’yannoo ny ymmodee bleeantyn shoh?

⁴ Eisht haink goo Chiarn ny flaunyssee hym’s, gra,

⁵ Loayr rish ooilley pobble ny cheerey, as rish ny saggyrtyn, gra, Tra ren shiu trostey as dobberan ayns y wheiggoo as ayns y chiaghtoo vee, dy jarroo son ny three-feed bleïn as jeih shen, nee er aght erbee ayns biallys dooys ren shiu ny trostaghyn shen y reayll?

⁶ As tra ren shiu gee, as tra ren shiu giu, nagh ren shiu gee as giu lurg nyn aigney hene?

⁷ Nagh lhisagh shiu tastey ’choyrt da my ghoan, ta’n Chiarn er n’ockley magh liorish ny chied phadeyryn, tra va cummaltee ayns Jerusalem, as ee hene ayns sonnys, as ny ard-valjyn eck ooilley mygeayrt-y-moee, tra va’n jiass as y cheer-rea fo slane cummaltee.

⁸ As haink goo yn Chiarn gys Zechariah, gra,

⁹ Myr shoh ta Chiarn ny flaunyssee loayrt, gra, Jean-jee briwnys firrinagh, as soilshee-jee myghin as erreeish dy chooilley ghooinney da e vraar.

¹⁰ As ny jean-jee tranlaase er y ven-treoghe, ny er y chloan gyn ayr, ny’n joarree, ny’n boght, as ny lhig da unnane eu smooinaghtyn er olk ayns e chree noi e vraar.

¹¹ Agh dob ad clashtyn, as hyndaa ad nyn gooyl, as ghooin ad nyn gleayshyn, nagh glinnagh ad.

¹² Dy jarroo ren ad nyn greeaghyn [cha creoi] as y chlagh adamant, nagh glinnagh ad yn leigh, as ny goan, ta Chiarn ny flaunyssee er choyrt ayns e spyrryd liorish ny chied phadeyryn: er-y-fa shen haink jymmoose vooar orroo voish Chiarn ny flaunyssee.

¹³ Shen-y-fa haink eh gy-kione, myr deïe eshyn, as nagh jinnagh ad clashtyn, myr shen deïe adsyn, as cha jinnin’s clashtyn, ta Chiarn ny flaunyssee dy ghra.

¹⁴ As skeayl mee ad lesh geay-chassee, mastey ooilley ny ashoonee quaagh daue: myr shoh va’n cheer ny hraartys nyn yeï, nagh jagh dooinney erbee ny hrooid huggey ny veih: son ren ad yn cheer aalin ny hraartys.