Zechariah 4 - Yn Vible Casherick 1775 1819

CAB. IV

¹ As haink yn ainle, va taggloo rhym, yn nah cheayrt, as ghooisht eh mish, myr dooinney t’er ny ghoostey ass e chadley.

² As dooyrt eh rhym, Cre t’ou fakin? As dooyrt mee, Ta mee er yeeaghyn, as cur-my-ner cainlere slane airhey, as claare er e vullagh, as ny shiaght lampyn echey er, as shiaght lhiggaghyn gys ny shiaght lampyn va er e vullagh:

³ As daa villey-olive liorish, billey er dagh cheu jeh’n chlaare.

⁴ Myr shen dreggyr mee, as loayr mee rish yn ainle va taggloo rhym, gra, Cre t’ad shoh, my hiarn?

⁵ As dansoor yn ainle va taggloo rhym, as dooyrt eh, Vel fys ayd’s cre t’ad shoh? As dansoor mee, Cha vel, my hiarn.

⁶ As dreggyr eh, as loayr eh rhym, gra, Shoh goo yn Chiarn gys Zerubbabel, gra, Cha nee liorish niart ny pooar, agh liorish my spyrryd, ta Chiarn ny flaunyssee dy ghra.

⁷ Quoi uss, O lieau mooar? roish Zerubbabel bee uss er dty yannoo rea, as nee eh soiaghey seose y chlagh-vullee er, lesh yllaghey, geam, Grayse, grayse dy row da.

⁸ Ny-sodjey na shoh haink goo yn Chiarn hym’s, gra,

⁹ Ta laueyn Zerubbabel er layal undin y thie shoh, ver ny laueyn echeysyn myrgeddin mullagh er; as bee fys ayd’s dy vel Chiarn ny flaunyssee er my choyrt hiuish.

¹⁰ Son adsyn nagh row scansh oc jeh laa ny nheeghyn fardalagh, gowee ad boggey, tra ver ad my-ner yn level ayns laue Zerubbabel, marish y chiaght shen; adsyn sooillyn y Chiarn, ta roie noon as noal er feaï-ny-cruinney.

¹¹ Eisht dreggyr mee, as dooyrt mee rish, Cre’n daa villey-olive shoh t’er dagh cheu jeh’n chainlere?

¹² As dreggyr mee reesht, as dooyrt mee rish, Cre’n daa vanglane olive ad shoh, ta folmaghey yn ooil casherick trooid daa lhiggey airhey ayns y chlaare airhey?

¹³ As dreggyr eh mee, as dooyrt eh, Nagh nhione dhyt, cre t’er ny hoiggal lioroo shoh? As dooyrt mee, Cha nhione, my hiarn.

¹⁴ Eisht dooyrt eh, T’ad shoh yn daa fer-ooilit, ta nyn shassoo fenish Chiarn y slane seihll.