Zechariah 2 - Yn Vible Casherick 1775 1819

CAB. II

¹ Hrog mee my hooillyn reesht, as yeeagh mee; as cur-my-ner, dooinney lesh line towshan ny laue.

² Eisht dooyrt mee, Cre’n raad t’ou goll? As dooyrt eh rhym, Dy ghoaill towshan Yerusalem, dy akin cre ta’n lheead echey, as cre ta’n lhiurid echey.

³ As cur-my-ner, hie yn ainle va taggloo rhym magh, as hie ainle elley magh ny whail.

⁴ As dooyrt eh rish, Roie, loayr rish yn dooinney aeg shoh, gra, Bee cummaltee ayns Jerusalem myr ayns baljyn gyn voallaghyn son ymmodee ny deiney, as yn ollagh t’ayn.

⁵ Son beem’s jeeish, ta’n Chiarn dy ghra, voalley dy aile ooilley mygeayrt, as beem’s yn ghloyr ayns y vean eck.

⁶ Ho, ho, tar-jee magh, as chea-jee veih cheer y twoaie, ta’n Chiarn dy ghra: son ta mee er skeayley shiu co-lhean rish kiare geayghyn yn aer, ta’n Chiarn dy ghra.

⁷ Livrey oo hene, O Zion, ta cummal marish inneen Vabylon.

⁸ Son myr shoh ta Chiarn ny flaunyssee dy ghra, Ta Jee ny ghloyr er my choyrt noi ny ashoonee ren shiuish y spooilley, son eshyn vennys riuish, t’eh bentyn rish clagh y thooill echeysyn.

⁹ Son cur-my-ner crie-ym my laue orroo, as bee ad son spooilley da nyn sharvaantyn, as bee fys eu, dy vel Chiarn ny flaunyssee er my choyrt.

¹⁰ Gow arrane, as bee gennal, O inneen Zion: son cur-my-ner, ta mee cheet, as nee’m cummal ayns y vean ayd’s, ta’n Chiarn dy ghra.

¹¹ As bee ymmodee ashoonee ayns y laa shen er ny lhiantyn gys y Chiarn, as bee ad my phobble: as neem’s cummal ayns y vean ayd’s, as bee fys ayd, dy vel Chiarn ny flaunyssee er my choyrt hood’s.

¹² As nee yn Chiarn goaill huggey hene myr eiraght Judah e chronney ayns y thalloo sheaynt, as gow ee eh reesht Jerusalem myr reih.

¹³ Lhig da ooilley sheelnaue ve nyn dhost kiongoyrt rish y Chiarn: son t’eh er hroggal seose eh-hene ayns e ynnyd casherick.