Zechariah 1 - Yn Vible Casherick 1775 1819

CAB. I

¹ Ayns yn hoghtoo vee, ayns y nah vleïn jeh reill Darius, haink goo yn Chiarn gys Zechariah, mac Varachiah, mac Iddo yn phadeyr, gra,

² Ta’n Chiarn er ny ve feer jymmoosagh rish ny ayraghyn euish.

³ Shen-y-fa, abbyr uss roosyn, Myr shoh ta Chiarn ny flaunyssee dy ghra, Chyndaa-jee hym’s, ta Chiarn ny flaunyssee dy ghra, as chyndaa-yms hiuish ta Chiarn ny flaunyssee dy ghra.

⁴ Ny bee-jee myr nyn ayraghyn, dauesyn deïe ny shenn phadeyryn, gra, Myr shoh ta Chiarn ny flaunyssee, gra, Chyndaa-jee nish voish nyn ghrogh raaidyn, as voish nyn ghrogh-yannoo: agh cha dug ad clashtyn, chamoo deaisht ad rhym’s, ta’n Chiarn dy ghra.

⁵ Ny ayraghyn euish, cre’n erree t’orroo? as ny phadeyryn, vel ad bio son dy bragh?

⁶ Agh my ghoan, as my lattyssyn, hug mee er currym my harvaantyn ny phadeyryn, nagh ren ad berraghtyn er nyn ayraghyn? as hyndaa ad, as dooyrt ad, ’Naght myr va Chiarn ny flaunyssee kiarit dy yannoo rooin, rere nyn raaidyn, as rere nyn yannoo, eer myr shen t’eh er ghellal rooin.

⁷ Er y chiarroo laa as feed jeh’n un vee yeig, ta shen mee Sebat, ayns y nah vleïn jeh Darius, haink goo yn Chiarn gys Zechariah, mac Varachiah, mac Iddo yn phadeyr, gra,

⁸ Honnick mee ’syn oie, as cur-my-ner, va dooinney markiaght er cabbyl ruy, as hass eh mastey ny biljyn-myrtle va heese ’sy choan, as cheu-chooylloo va cabbil ruy, brack as bane.

⁹ Eisht dooyrt mee, O my Hiarn, cre t’ad shoh? As dooyrt yn ainle, va taggloo rhym, Soilshee-ym dhyt cre t’ad shoh.

¹⁰ As dreggyr yn dooinney, va ny hassoo mastey ny biljyn-myrtle, as dooyrt eh, Shoh adsyn ta’n Chiarn er choyrt dy hooyl noon as noal trooid y cheer.

¹¹ As dreggyr ad ainle y Chiarn, va ny hassoo mastey ny biljyn-myrtle, as dooyrt ad, Ta shin er hooyl noon as noal fud y cheer, as cur-my-ner, ta shee as kiunid trooid ooilley yn cheer.

¹² Eisht dreggyr ainle y Chiarn, as dooyrt eh, O Hiarn ny flaunyssee, caïd nagh jean oo soilshaghey myghin er Jerusalem, as er ard-valjyn Yudah, nyn ’oï t’ou er ve nish jymmoosagh, son three-feed bleïn as jeih?

¹³ As dreggyr y Chiarn yn ainle, va taggloo rhym, lesh focklyn meeley, as goan gerjoilagh.

¹⁴ Myr shoh dooyrt yn ainle va taggloo rhym, Cur uss eam, gra, Myr shoh ta Chiarn ny flaunyssee dy ghra, Ta mish eadolagh son Jerusalem, as son Zion, lesh eadolys jeean.

¹⁵ As ta mee erskyn-towse jymmoosagh rish ny ashoonee ta ec nyn aash: son ga dy row my chorree eddrym, hug adsyn my heaghyn er y hoshiaght.

¹⁶ Shen-y-fa myr shoh ta’n Chiarn dy ghra, Ta mee er hyndaa gys Jerusalem lesh myghinyn: bee my hie’s troggit ayn, ta Chiarn ny flaunyssee dy ghra, as bee line towshan er ny heeyney magh er Jerusalem.

¹⁷ Cur eam elley, gra, Myr shoh ta Chiarn ny flaunyssee dy ghra, Bee my ard-valjyn lhieeney harrish lesh maynrys, as nee’n Chiarn reesht Zion y gherjaghey, as Jerusalem y reih.

¹⁸ Eisht hrog mee seose my hooillyn, as honnick mee, as cur-my-ner kiare eairkyn.

¹⁹ As dooyrt mee rish yn ainle, va taggloo rhym, Cre t’ad shoh? as dreggyr eh mee, Shoh ny eairkyn ta er skeayley Judah, Israel, as Jerusalem.

²⁰ As yeeagh y Chiarn dooys kiare seyir.

²¹ Eisht dooyrt mee, Cre t’ad shoh cheet dy yannoo? As loayr eh, gra, T’ad shoh ny eairkyn, ta er skeayley Judah, myr shen nagh by-loys da dooinney erbee troggal e chione: agh t’ad shoh er jeet dy agglagh ersooyl ad, as dy cheau magh eairkyn ny ashoonee, hrog seose nyn eairk harrish cheer Yudah, dy skeayley eh.