Ruth 4 - Yn Vible Casherick 1775 1819

CAB. IV

¹ Eisht hie Boaz seose gys giat yn ard-valley, as hoie eh sheese ayns shen: as cur-my-ner, haink y dooinney-mooinjerey shaghey, ren Boaz gimraa er; rishyn dooyrt eh, Ho, lheid y fer! shass stiagh, soie sheese ayns shoh. As hass eh stiagh, as hoie eh sheese.

² As ghow eh jeih deiney jeh shanstyr yn ard-valley, as dooyrt eh, Soie-jee shiuish ayns shoh. As hoie ad sheese.

³ As dooyrt eh rish y dooinney-mooinjerey, Ta Naomi, t’er jeet reesht ass cheer Voab, mysh creck peesh dy halloo, va lesh nyn mraar Elimelech:

⁴ As va mee booiagh fys y ve ayd er, gra rhyt, Kionnee eh fenish ny cummaltee, as fenish shanstyr my phobble. My nee oo feaysley eh, jean shen; agh mannagh vel oo son feaysley eh, abbyr shen, dy vod fys’ve aym cree nee’m: son cha vel fer dy eaysley eh agh oo-hene; as ta mish dty yeï. As dooyrt eh, Neem’s feaysley eh.

⁵ Eisht dooyrt Boaz, Er y laa t’ou kionnaghey’n thalloo veih laue Naomi shegin dhyt myrgeddin kionnaghey eh veih Ruth yn Moabitess, ben y varroo, dy chummal seose ennym y varroo ’syn eiraght echey.

⁶ As dooyrt yn dooinney-mooinjerey, Cha voddym feaysley eh er my hon hene, fegooish jannoo assee da m’eiraght hene: ta mee livrey seose my chairys hood’s, son cha vel mee son feaysley eh.

⁷ Nish shoh va’n chenn chliaghtey ayns Israel mychione kionnaghey, as mychione caghlaa, dy chonfyrmal dy chooilley nhee; Va dooinney dy hayrn jeh e vraag, as dy livrey eh da e naboo: as va shoh yn cowrey-feayslee ayns Israel.

⁸ Shen-y-fa dooyrt y dooinney-mooinjerey rish Boaz, Kionnee eh ayns dty chairys hene: Myr shen ghow eh jeh e vraag.

⁹ As dooyrt Boaz rish y chanstyr, as rish ooilley’n pobble, Ta shiuish nyn veanishyn er y laa shoh, dy vel mish er chionnaghey ooilley ny va lesh Elimelech, as ooilley ny va lesh Chilion as Mahlon, veih laue Naomi.

¹⁰ Marish shoh, Ruth yn Moabitess, ben Mahlon, ta mee er chionnaghey dy ve my ven’s, dy chummal seose ennym y varroo ayns e eiraght, nagh bee ennym y varroo er ny yiarey jeh veih mastey e vraaraghyn, as veih giat e phobble: ta shiu nyn veanishyn yn laa jiu.

¹¹ As dooyrt ooilley’n pobble v’ayns y whaiyl, as ny briwnyn, Ta shin feanishyn: dy der y Chiarn er y ven ta er jeet stiagh ayns dty hie dy ve myr Rachel as myr Leah, ad shoh nyn-neesht ren soiaghey seose thie Israel: as dy bee oo onnoroil ayns Ephratah, as ooasle ayns Beth-lehem:

¹² As dy bee dty hie’s goll-rish thie Pharez, (ren Tamar y ymmyrkey da Judah,) jeh’n sluight ver y Chiarn dhyt jeh’n ven aeg shoh.

¹³ Myr shen ren Boaz goaill Ruth, as v’ee e ven-phoost: as tra haink ad cooidjagh, hug y Chiarn yn bannaght jee dy ymmyrkey mac.

¹⁴ As dooyrt ny mraane rish Naomi, Bannit dy row’n Chiarn, nagh vel dt’aagail jiu fegooish eirey, jeh ennym ooasle ayns Israel.

¹⁵ As dy ve dhyt’s son lhiurid bea, as gerjagh dty henn eash: son dty inneen-’sy-leigh ta graihagh ort, as ish ny share dhyt na shiaght mec, ta er n’ymmyrkey eh.

¹⁶ As ghow Naomi yn lhiannoo gys yn oghrish eck, as ren ee boandyrys eh.

¹⁷ As hug ny mraane ny naboonyn eck ennym er, gra, Ta mac er ny ruggey da Naomi, as denmys ad eh Obed: eshyn ayr Jesse, ayr Ghavid.

¹⁸ Nish ad shoh sheelogheyn Pharez: hooar Pharez Hezron,

¹⁹ As hooar Hezron Ram, as hooar Ram Amminadab.

²⁰ As hooar Amminadab Nahshon, as hooar Nahshon Salmon,

²¹ As hooar Salmon Boaz, as hooar Boaz Obed,

²² As hooar Obed Jesse, as hooar Jesse David.