Ruth 2 - Yn Vible Casherick 1775 1819

CAB. II

¹ As va ec Naomi dooinney-mooinjerey da’n sheshey eck, ny ghooinney feer verchagh, jeh kynney Elimelech; as va’n ennym echey Boaz.

² As dooyrt Ruth yn Moabitess rish Naomi, Lhig dou nish goll gys y vagher, dy yeeassyragh geiyrt ersyn nee’n foayr shen y hoilshaghey dou. As dooyrt ee r’ee, Immee, my inneen.

³ As hie ee ro-ee, as haink ee, as ren ee jeeassyragh ’sy vagher lurg ny beayneeyn: as haghyr ee er yn ayrn jeh’n vagher va lesh Boaz, va jeh kynney Elimelech.

⁴ As cur-my-ner, haink Boaz veih Beth-lehem, as dooyrt eh rish ny beayneeyn, Dy row yn Chiarn mêriu. As dreggyr ad, Dy jean y Chiarn dty vannaghey.

⁵ Eisht dooyrt Boaz rish y stiurt va harrish ny beayneeyn, Quoi’n ven aeg shoh?

⁶ As dansoor y stiurt va harrish ny beayneeyn, as dooyrt eh, She’n ven aeg t’ayn haink marish Naomi veih cheer Voab:

⁷ As dooyrt ee, Ta mee guee erriu, lhig dou jeeassyragh geiyrt er ny beayneeyn fud ny bunneeyn: shoh myr haink ee, as t’ee er vuirriaght er-dyn voghrey derrey nish, agh dy jagh ee thie son tammylt.

⁸ Eisht dooyrt Boaz rish Ruth, Eaisht rhym, my inneen, ny gow dy yeeassyragh ayns magher erbee elley, chamoo scugh veih shoh, agh freill oo-hene er-gerrey da ny mraane aegey aym’s:

⁹ Lhig da dty hooillyn ve er y vagher t’adsyn dy vuinn, as gow uss geiyrt orroo: nagh vel mee er chur currym er ny deiney aegey, nagh jean ad dty lhiettal? as tra t’ou paagh, gow gys ny siyn, as iu jeh shen ny ta ny deiney aegey er hayrn.

¹⁰ Eisht chroym ee sheese lesh e eddin gys y thalloo, as dooyrt ee rish, Kys te dy vel mee er gheddyn yn foayr shoh ayns dty hilley, dy vel oo er ghoaill tastey jeem’s, nagh vel agh joarree?

¹¹ As dreggyr Boaz as dooyrt eh r’ee, Ta slane toiggal aym jeh ooilley ny t’ou er n’yannoo son dty voir-’sy-leigh neayr’s baase dty heshey; as kys t’ou er n’aagail dty ayr as dty voir, as y cheer ayn v’ou ruggit, as er jeet mastey pobble joarree.

¹² Dy jean y Chiarn dty chooilleeney son dty obbyr, as dy bee slane leagh er ny choyrt dhyt veih’n Chiarn Jee Israel, fo ny skianyn echey t’ou coyrt dty varrant.

¹³ Eisht dooyrt ee, Lhig dou foayr y gheddyn ayns dty hilley, my hiarn; son dy vel oo er my gherjaghey, as dy vel oo er loayrt dy dooie rish dty inney-veyl, ga nagh vel mish dy ve soylit gys veg jeh dty harvaantyn.

¹⁴ As dooyrt Boaz r’ee, Ec traa-lhongey tar uss ayns shoh, as gow greme d’arran, as thum eh ayns y vinegar. As hoie ee liorish ny beayneeyn; as hirveish eh ee lesh arroo greddanit, as ren ee gee, as va dy liooar eck, as fooilliagh.

¹⁵ As tra v’ee er n’irree dy yeeassyragh, hug Boaz currym er ny deiney aegey echey, gra, Lhig-jee jeelym, eer mastey ny bunneeyn, as ny fow-jee foill jee:

¹⁶ As lhig-jee myrgeddin da lane duirn nish as reesht tuittym jeh nyn yoïn er e son, as faag-jee ad jeeish dy hymsagh, as ny abbyr-jee veg r’ee.

¹⁷ Myr shen ren ee jeeassyragh ’sy vagher derrey’n astyr, as woaill ee ny v’ee er haglym; as ve mysh Ephah dy oarn.

¹⁸ As hrog ee eh, as hie ee rhymbee gys yn ard-valley; as honnick e moir-’sy-leigh ny v’ee er hymsagh: as hug ee jee yn fooilliagh v’ee er reayll lurg j’ee ve jeant magh.

¹⁹ As dooyrt e moir-’sy-leigh r’ee, C’raad t’ou er ve jeeassyragh jiu? as c’raad v’ou ec obbyr? bannit dy row eshyn ghow tastey jeed. As dinsh ee da e moir-’sy-leigh quoi marish ren ee gobbraghey. As dooyrt ee, Ta ennym y dooinney raad va mee ec obbyr iu Boaz.

²⁰ As dooyrt Naomi rish yn inneen-’sy-leigh eck, Bannit dy row eshyn jeh’n Chiarn, nagh vel er vreayll e chenjallys veih ny bio, ny veih ny merriu. As dooyrt Naomi r’ee, Ta’n dooinney faggys mooinjerys dooin, fer jeh nyn gynney sniessey.

²¹ As dooyrt Ruth yn Moabitess, Doardee eh dou myrgeddin, Nee uss freayll liorish my gheiney aegey, derrey vees ooilley’n fouyr aym harrish.

²² As dooyrt Naomi rish Ruth yn inneen-’sy-leigh eck, Te yn aght share dhyt, my inneen, dy gholl magh marish ny mraane aegey echeysyn, er-aggle nagh jean oo farrail cha mie ayns magher erbee elley.

²³ Myr shen chum ee kinjagh marish mraane aegey Boaz dy yeelym gys jerrey’n fouyr-oarn, as y fouyr-churnagh; as ren ee baghey marish e moir-’sy-leigh.