Romanee 12 - Yn Vible Casherick 1775 1819

CAB. XII

¹ Ta mee guee erriu er-y-fa shen, vraaraghyn, liorish myghinyn Yee, dy jean shiu chebbal nyn gallinyn myr oural bio, casherick, booisal gys Jee, ta’n chirveish resoonagh eu.

² As ny jean-jee shiu hene y chummey gys y theihll shoh; agh bee-jee er nyn gaghlaa ayns y cummey noa jeh nyn aigney, dy vod shiu prowal cre ta’n aigney shen dy Yee ta mie as booisal da, as dy slane casherick.

³ Son, liorish y ghrayse er ny choyrt dooys, ta mee gra rish dy chooilley ghooinney ta ny-vud eu, gyn dy smooinaghtyn ny syrjey jeh hene na lhisagh eh smooinaghtyn; agh dy smooinaghtyn dy sheelt, cordail rish y towse dy chredjue ta Jee er rheynn er dy chooilley ghooinney.

⁴ Son myr ta ain ymmodee oltyn ayns un chorp, as cha nee yn un oik t’ec dy chooilley olt:

⁵ Myr shen ta shinyn, ga ymmodee, un chorp ayns Creest, as dy chooilley unnane oltyn yn derrey yeh jeh’n jeh elley.

⁶ Fakin eisht dy vel ain caghlaa dy ghiootyn cordail rish y ghrayse t’er ny choyrt dooin, edyr y ve son phadeyrys, lhig dooin jannoo phadeyrys cordail rish y corrymid dy chredjue:

⁷ Ny shirveish, lhig dooin tastey y choyrt da’n chirveish ain; ny eshyn ta gynsaghey, da ynsagh;

⁸ Ny eshyn ta coyrlaghey, da coyrle; eshyn ta cur da’n voght, lhig da ’yannoo eh lesh feoiltys; eshyn ta reill, lesh imnea; eshyn ta soilshaghey myghin, lesh gennallys.

⁹ Lhig da graih ve fegooish foalsaght. Cur-jee dwoaie da shen ta olk, lhian-jee gys shen ta mie.

¹⁰ Bee-jee jeh aigney dooie yn derrey yeh gys y jeh elley lesh graih braaragh, ayns onnor dagh unnane jannoo soiagh jeh fer elley roish hene.

¹¹ Cha nee liastey ayns obbyr; agh jeean ayns spyrryd; shirveish y Chiarn:

¹² Gennal ayns treishteil; surransagh ayns seaghyn; tannaghtyn kinjagh ayns padjer:

¹³ Rheynn gys ymmyrch ny nooghyn; arryltagh dy choyrt oltaghey-bea da troailtee.

¹⁴ Bannee-jee adsyn ta jannoo tranlaase erriu; bannee-jee, as ny gwee-jee mollaght.

¹⁵ Gow-jee boggey mâroosyn ta goaill boggey, as jean-jee dobberan mâroosyn ta dobberan.

¹⁶ Bee-jee jeh un aigney yn derrey yeh gys y jeh elley. Ny soie-jee nyn aigney er nheeghyn ard, agh croym-jee gys deiney ta injil ayns stayd. Ny bee-jee creeney ayns ny smooinaghtyn eu hene.

¹⁷ Ny jean-jee olk son olk y chooilleeney da dooinney erbee. Kiare-jee ro-laue dy yannoo reddyn onneragh ayns shilley dy chooilley ghooinney.

¹⁸ My oddys eh ve, wheesh as t’ayns nyn booar, jean-jee baghey ayns shee rish dy chooilley ghooinney.

¹⁹ Chaarjyn ghraihagh, ny gow-jee cooilleen ec nyn laue hene, agh ny sleaie lhig-jee lesh corree: son te scruit, Lhiam’s kerraghey; mish nee cooilleeney, ta’n Chiarn dy ghra.

²⁰ Shen-y-fa my ta dty noid accryssagh, cur da bee; my t’eh paagh, cur jough da: son liorish jannoo shoh nee oo cruinnaghey smarageyn dy aile er e chione.

²¹ Ny lhig da’n olk barriaght y gheddyn ort, agh fow barriaght er yn olk lesh jannoo mie.