Raaghyn Creeney 9 - Yn Vible Casherick 1775 1819

CAB. IX

¹ Ta creenaght er droggal thie jee hene, t’ee er chummey jee hene shiaght pillaryn.

² T’ee er varroo e beïyn, t’ee er hayrn e feeyn: t’ee myrgeddin er hoiaghey magh e boayrd.

³ T’ee er choyrt magh e moidynyn, t’ee cur eam veih ynnydyn s’cronnal yn ard-valley.

⁴ Quoi-erbee ta gyn ynsagh, lhig da chyndaa stiagh ayns shoh: er son eshyn ta gyn tushtey, t’ee gra rish;

⁵ Tar-jee, ee-jee jeh my arran, as iu-jee jeh’n feeyn kiarit nyn gour.

⁶ Treig-jee yn vooinjer ommijagh, as bee-jee bio: as immee-jee ayns y raad dy chreenaght.

⁷ Eshyn ta cur oghsan da’n ghrynder, t’eh geddyn nearey da hene; as eh ta coyrlaghey yn vee-chrauee, t’eh tayrn er hene oltooan.

⁸ Ny coyrlee yn ghannidagh, er-aggle dy der eh feoh dhyt; coyrlee yn dooinney creeney, as bee eh ayns aigney-mie rhyt.

⁹ Ynsee dooinney creeney, as bee eh foast ny s’creeney; cur roish dooinney ynrick, as nee eh bishaghey ayns ynsagh.

¹⁰ Ta aggle y Chiarn toshiaght creenaght, as dy hoiggal casherickys, ta shoh tushtey.

¹¹ Son liorym’s bee dty laghyn ymmodee, as bleeantyn dty vea er ny vishaghey.

¹² My t’ou creeney, bee oo creeney dhyt hene; agh my t’ou cur rish craid, oo hene surrys er y hon.

¹³ Ta ben ommijagh ny beealerey; t’ee gyn tort, as cha vel monney keeayl eck.

¹⁴ Son t’ee soie ec dorrys e thie, er stoyl ayns ynnydyn smoo taaghit yn ard-valley.

¹⁵ Dy eamagh er troailtee, ta goll jeeragh er y raad.

¹⁶ Quoi-erbee ta mee-hushtagh, lhig da chyndaa stiagh ayns shoh: as son eshyn ta giare-cheeayllagh, t’ee gra rish;

¹⁷ S’millish ta ushtaghyn braddagh, as arran eeit dy follit, te blaystal.

¹⁸ Agh cha vel fys echey dy vel ny merriu ayns shen; as dy vel ny goaldee ecksh ayns diunidyn niurin.