Raaghyn Creeney 8 - Yn Vible Casherick 1775 1819

CAB. VIII

¹ Nagh vel creenaght geamagh, as tushtey cur magh e coraa?

² T’ee shassoo er mullagh yn yrjey, rish ny raaidyn mooarey smoo taaghit.

³ T’ee gyllaghey ec ny giattyn, ec cheet-stiagh yn ard-valley, ec fosley ny dorryssyn.

⁴ Hiuish, O gheiney, ta mee geamagh, as ta my choraa gys cloan gheiney.

⁵ O shiuish gyn tort, gow-jee creenaght: as shiuish vee-cheeayllagh bee-jee jeh cree toiggalagh.

⁶ Eaisht-jee, son loayr-yms jeh ny cooishyn s’ooasle, as bee fosley my veillyn mysh reddyn jeeragh.

⁷ Son loayree my veeal yn irriney, as ta mee-chairys dwoaiagh da my veillyn.

⁸ Ta ooilley goan my veeal ayns cairys, cha vel nhee erbee camlaagagh ny cluicagh ayndoo.

⁹ T’ad ooilley cronnal da’n toiggalagh, as jeeragh dauesyn ta geddyn tushtey.

¹⁰ Gow my ynsagh roish argid, as keeayl roish yn airh s’costal.

¹¹ Son ta creenaght ny share na rubieyn; as cha vel dy chooilley nhee oddys ve er ny yeearree, dy ve soylit r’ee.

¹² Ta mish creenaght cummal marish keeayl; as toiggal bun raaghyn creeney.

¹³ Te aggle y Chiarn dy chur feoh da olk: moyrn, as mooaralys, as y drogh raad, as y beeal molteyragh, ta dwoaie aym orroo.

¹⁴ Mârym’s ta coyrle vie, as keeayl fondagh: mish tushtey, as mish niart.

¹⁵ Liorym’s ta reeaghyn reill, as princeyn shirveish cairys.

¹⁶ Liorym’s ta princeyn reill, as deiney ooasle, eer ooilley briwnyn y theihll.

¹⁷ Shynney lhiam adsyn shynney lhieu mee, as adsyn hirrys mee dy leah, yiow ad mee.

¹⁸ Mârym’s ta berchys as ooashley, dy feer berchys beayn, as ynrickys.

¹⁹ Ta my vess ny share na airh, dy feer, na’n airh s’glenney, as my heet-stiagh roish reih argid.

²⁰ Mish y leeideilagh ayns raad yn ynrickys, ayns ny cassanyn jeeragh dy vriwnys.

²¹ Dy choyrt cooid vie ayns eiraght dauesyn shynney lhiam, as ny tashtaghyn oc y lhieeney.

²² Va mee marish y Chiarn ayns toshiaght e raaidyn, roish e obbraghyn er-dy-rieau.

²³ Va mee soit seose ayns pooar er dy bragh, veih’n toshiaght, ny my row’n seihll er ny chroo.

²⁴ Roish my row diunidyn ayn, va mish ayn: tra nagh row ny farraneyn ushtey er vrishey magh.

²⁵ Roish my row ny sleityn troggit; roish ny croink va mee er my ymmyrkey.

²⁶ Tra nagh row eh foast er n’yannoo yn thalloo, ny ny magheryn, ny yn ayrn syrjey jeh joan y theihll.

²⁷ Tra ren eh coamrey ny niaughyn, va mish ayns shen: tra hayrn eh combaase mysh eaghtyr y diunid:

²⁸ Tra ren eh meihaghey ny bodjallyn ’syn yrjey, as towse magh farraneyn y diunid:

²⁹ Tra hug eh da’n aarkey e oardaghey, nagh ragh ny ushtaghyn harrish e harey: tra hoie eh undinyn y thallooin:

³⁰ Eisht va mee liorish, myr co-beayn rish: as va mee e haitnys gagh-laa, goaill boggey dy kinjagh kiongoyrt rish:

³¹ Goaill boggey ayns cummaltee yn theihll, as va my haitnys marish cloan gheiney.

³² Nish er-y-fa shen, eaisht-jee rhym’s, O shiuish my chloan: son bannit t’adsyn ta freayll my raaidyn.

³³ Eaisht-jee rish ynsagh, as bee-jee creeney, as ny obb-jee ee.

³⁴ S’maynrey’n dooinney, ta dy my chlashtyn, ta er e arrey gagh laa ec my yiattyn, farkiaght ec essynyn my ghorrys.

³⁵ Son quoi-erbee ta dy my gheddyn, t’eh geddyn bea, as cosney foayr veih’n Chiarn.

³⁶ Agh eshyn ta jannoo peccah m’oï, t’eh jannoo aggair da’n annym echey hene: adsyn ooilley ta dwoaie oc orrym’s, shynney lhieu yn baase.