Raaghyn Creeney 7 - Yn Vible Casherick 1775 1819

CAB. VII

¹ My vac, freill my ghoan, as tasht seose my haraghyn mayrt.

² Freill my haraghyn as bee oo beayn: as my leigh myr clagh dty hooill.

³ Kiangle ad er dty veïr, scrieu ad er glaare dty chree.

⁴ Abbyr rish creenaght, Uss my huyr, as rish tushtey, Uss my ven-vooinjerey.

⁵ Dy vod ad oo y reayll veih’n oainjyr veih’n streebagh ta brynneraght lesh e goan.

⁶ Son ec uinniag my hie, yeeagh mee trooid my chasement,

⁷ As cur-my-ner mastey yn vooinjer vee-cheeayllagh, honnick mee fud yn aegid, dooinney aeg gyn tushtey,

⁸ Goll trooid y traïd, er-gerrey da’n corneil eck, as hie eh raad e thie.

⁹ ’Sy cho-leayrtys, ayns fastyr yn oie ghoo ghorraghey.

¹⁰ As cur-my-ner haink ben ny whail, ayns coamrey strumpag, as jeh cree croutagh.

¹¹ (T’ee beealeragh as mee-reiltagh, cha vel ny cassyn eck fuirriaght ec y thie.

¹² Nish t’ee mooie, chelleeragh ayns ny straïdyn, as eisht ny lhie farkiaght ec dy chooilley chorneil.)

¹³ Myr shen ghow ee greme er, as phaag ee eh, as lesh eddin daaney dooyrt ee rish,

¹⁴ Ta mee er hebbal my ourallyn-shee: jiu ta mee er eeck my vreearraghyn.

¹⁵ Shen-y-fa haink mee magh dty whail, dy aggindagh dy yeeaghyn er dty hon, as ta mee er dty gheddyn.

¹⁶ Ta mee er hoiaghey magh my lhiabbee lesh coodaghyn tapestry, lesh postyn grainnit, lesh aanrit keyl Egypt.

¹⁷ Ta mee er spreih my lhiabbee lesh myrrh, aloes, as cinnamon.

¹⁸ Tar royd, lhig dooin goaill nyn saie dy ghraih, derrey’n voghrey, lhig dooin shin hene y gherjaghey lesh graih.

¹⁹ Son cha vel my heshey ec y thie, t’eh er ghoaill jurnah foddey.

²⁰ T’eh er ghoaill sporran argid mârish, as hig eh dy valley ec laa pointit.

²¹ Lesh e mooarane glare aalin hug ee er cur raad, lesh brynneraght e meillyn chossyn ee er.

²² T’eh goll geiyrt urree er-y-chooyl, myr dow gys y teigh, ny myr ommydanyn gys kerraghey ny stockyn.

²³ Derrey bwoaillys side trooid yn aane echey, myr eean ta getlagh gys y ribbey, as nagh vel geill eck, dy vel eh soit son e bioys.

²⁴ Eaisht-jee rhym’s nish, er-y-fa shen, O shiuish my chloan, as cur-jee tastey da goan my veeal.

²⁵ Ny lhig da dty chree chyndaa gys ny raaidyn ecksh, ny gow er-shaghryn ayns ny cassanyn eck.

²⁶ Son t’ee er lhieggal, as er lhottey ymmodee deiney lajer: as shimmey’n fer trean t’er ny ve stroit lioree.

²⁷ Ta’n thie eck yn raad gys niurin, goll sheese gys shamyryn y vaaish.