Raaghyn Creeney 6 - Yn Vible Casherick 1775 1819

CAB. VI

¹ My vac, my t’ou raane roish dty charrey, my t’ou er choyrt fo dty laue son joarree.

² T’ou ayns ribbey liorish goan dty veeal, t’ou goit lesh focklyn dty veeal hene.

³ Jean shoh nish, my vac, as feayshil oo hene, tra t’ou er jeet fo pooar dty naboo: immee, jean oo hene y injillaghey, as jean shickyr jeh dty charrey.

⁴ Ny cur cadley da dty hooillyn, ny saveenagh da ferrooghyn dty hooill.

⁵ Jean oo hene y livrey, myr y feeaïh veih laue y chelgeyr, as myr ushag ass laue y ribbeyder.

⁶ Immee gys y sniengan, uss chadlag, smooinee er ny raaidyn ecksh, as gow keeayl.

⁷ Ish, ta fegooish leeideilagh, oaseir, ny fir-reill,

⁸ Ta cosney e bee ’sy tourey, as dy haglym e beaghey ’syn ouyr.

⁹ Caïd nee oo cadley, O chadleyder, cuin irrys oo ass dty chadley?

¹⁰ Foast tammylt beg dy chadley, tammylt son saveenys, tammylt son filley ny laueyn dy chadley.

¹¹ Myr shen hig dty voghtynid ort, myr troailtagh, as dt’eme myr dooinney-caggee.

¹² Ta’n drogh-yantagh, dooinney mee-chrauee, shooyl lesh beeal cluicagh.

¹³ T’eh meekey lesh e hooillyn, t’eh loayrt lesh e chassyn, t’eh gynsagh lesh e veïr.

¹⁴ Ta foalsaght ayns e chree, t’eh shêgin er olk dy kinjagh, t’eh cur streeu er y hoshiaght.

¹⁵ Shen-y-fa hig e heaghyn er doaltattym: ’sy tullogh bee eh brisht fegooish couyr.

¹⁶ Ny shey reddyn shoh ta’n Chiarn feohdaghey, as ta eer yn chiaghtoo dwoaiagh da.

¹⁷ Shilley moyrnagh, chengey vreagagh, as laueyn ta deayrtey yn uill neu-chyndagh.

¹⁸ Cree ta geiyrt er drogh smooinaghtyn, cassyn ta bieau ayns roie gys olk.

¹⁹ Feanish foalsey ta ginsh breagyn, as eshyn ta doostey anvea eddyr braaraghyn.

²⁰ My vac, freill sarey dt’ayrey, as ny treig leigh dty vayrey.

²¹ Kiangle ad kinjagh er dty chree, as sniem ad mysh dty wannal.

²² Tra t’ou shooyl, bee eh dty leeideilagh, tra t’ou dty chadley, nee eh dty choadey; as tra t’ou doostey, loayree eh rhyt.

²³ Son ta’n anney myr cainle, as ta’n leigh soilshey; as smaght lesh ynsagh, te raad y vea.

²⁴ Dy reayll oo veih drogh ven, veih chengey brynneragh yn oainjyr.

²⁵ Ny lhig da dty chree ve soit er yn aalid eck, as ny lhig j’ee oo y chleayney lesh ferrooghyn e sooill.

²⁶ Son liorish drogh ven ta dooinney tayrnit sheese gys boghtynid: as nee ben adultrinagh shelg son y vioys mooar-leagh.

²⁷ Vod dooinney aile y ghoaill ayns e oghrish, as gyn e eaddagh ve losht?

²⁸ Vod peccagh shooyl er smarageyn jiarg, as gyn e chassyn ve losht?

²⁹ Myr shen eshyn ta jannoo peccah rish ben e naboo: quoi-erbee vennys r’ee cha bee eh gyn-loght.

³⁰ Cha vel deiney jeeaghyn er loght y vaarliagh dy ve wheesh, my t’eh geid dy yannoo magh e êgin, tra t’eh goll neeu.

³¹ Agh my ta briaght cheet er, nee eh lhiasaghey shiaght filley: ver eh ooilley cooid e hie.

³² Agh quoi-erbee ta brishey poosey, t’eh laccal tushtey: eshyn ta dy yannoo eh, t’eh stroie yn annym echey hene.

³³ Lhott as scammylt nee eh geddyn: as cha bee yn oltooan echey dy leah er ny yarrood.

³⁴ Son ta eadolys eulys y dooinney: shen-y-fa cha bee eh myghinagh ayns laa yn chooilleen.

³⁵ Cha der eh geill da lhiasaghey erbee: chamoo vees eh meenit, ga dy jebbagh oo ymmodee giootyn.