Raaghyn Creeney 5 - Yn Vible Casherick 1775 1819

CAB. V

¹ My vac, cur tastey da my chreenaght, as croym dty chleaysh gys my ynsagh.

² Dy vod oo cur geill da coyrle vie, as dy vod dty veillyn freayll tushtey.

³ Son ta meillyn y ven-oainjyr shilley, myr kere-volley, as ta’n beeal eck ny shliawn na’n ooil.

⁴ Agh ta’n jerrey eck sharroo myr yn ullymar, gyere myr cliwe dy ghaa foyr.

⁵ Ta ny cassyn eck goll sheese gys yn oaie: ta ny kesmadyn eck goaill greme er niurin.

⁶ Dy dty chleayney veih smooinaghtyn er raad y vea, ta ny cassanyn ecksh camlaagagh, nagh vod oo toiggal ad.

⁷ Eaisht-jee rhym eisht, er-y-fa shen, O shiuish my chloan, as ny scarr-jee rish goan my veeal.

⁸ Freill dty raad foddey vo-ee, as ny tar coair dorrys y thie eck.

⁹ Er-aggle dy der oo dty ghoo mie ayns pooar joarreeyn, as bleeantyn dty [niart] da’n vooinjer ghewil.

¹⁰ Er-aggle neesht dy bee joarreeyn ayns slane soylley dty verchys, as dty chosney ayns thie joarree,

¹¹ As dy jean oo dobberan ec y jerrey, tra vees dty eill as dty chorp er shymley ersooyl,

¹² As dy jir oo, Kys va mee dwoaiagh er ynsagh, as kys ren my chree soiaghey beg jeh coyrle.

¹³ As nagh dug mee biallys da coraa my ir-ynsee, as nagh ren mee my chleaysh y chroymmey dauesyn hug roym.

¹⁴ Va mee faggys ayns dy chooilley olk, fenish y phobble, as y cho-chruinnaght.

¹⁵ Iu ushtey ass dty haagh hene, as ushtaghyn geill ass dty hibbyr hene.

¹⁶ Lhig da ny farraneyn ayd’s roie magh dy lhean, as strooanyn ushtey ayns ny straïdyn.

¹⁷ Lhig daue ve ynrycan lhiat hene, as cha nee lesh joarreeyn ayns ayrn mayrt.

¹⁸ Lhig da dty farrane ve bannit, as gow boggey ayns ben-phoost dty aegid.

¹⁹ Lhig j’ee ve myr y feeaïh veen, as myr cretoor ennoil mygeayrt thie: lhig da ny keeaghyn ecksh oo y wooiys dy kinjagh, as gow uss taitnys dagh traa ayns y ghraih eck.

²⁰ As cre’n-fa, my vac, bee oo er dty chleayney liorish ben whuaagh, as taitnys ayd ayns oghrish oainjyr?

²¹ Son ta raaidyn dooinney fo sooillyn y Chiarn, as t’eh cronnaghey ooilley e immeeaght.

²² Nee e vee-chairys hene yn vee-chrauee y ghreimmey, as bee eh sniemmit.

²³ Yiow eh baase gyn ynsagh, as ayns mooadys e ommijys hed eh er-shaghryn.