Raaghyn Creeney 4 - Yn Vible Casherick 1775 1819

CAB. IV

¹ Eaisht-jee shiuish chloan, rish ynsagh nyn ayr, as bee-jee imneagh dy hoiggal tushtey.

² Son ta mee dy choyrt diu ynsagh mie, ny treig-jee my choyrle.

³ Son va mish mac ynrycan my ayr, meen as mettey ayns shilley my vayrey.

⁴ Dynsee eshyn mee neesht, as dooyrt eh rhym, Lhig da dty chree goaill stiagh my ghoan: freill my annaghyn, as bee oo bio.

⁵ Jean creenaght y chosney, cosne tushtey: ny jarrood eh, as ny jean scarrey rish goan my veeal.

⁶ Ny treig ee, as nee ish oo y choadey: bee graihagh urree, as nee ish fendeil oo.

⁷ Ta creenaght yn ard-vannaght, shen-y-fa fow creenaght: as lesh ooilley dty chooid-seihlt jean tushtey y chosney.

⁸ Jean mooar j’ee, as nee ish soiaghey seose oo; ver ee lh’ee oo gys ooashley, tra t’ou goaill hood ee.

⁹ Ver ish er dty chione yn attey dy ghrayse: crown gloyroil stowys ee ort.

¹⁰ Eaisht, O my vac, as gow my raaghyn hood: as bee bleeantyn dty heihll ymmodee.

¹¹ Ta mee er dty ynsagh ayns raad ny creenaght: ta mee er dty leeideil ayns cassanyn jeeragh.

¹² Tra t’ou shooyl, cha bee dty chesmadyn chionnit, as tra t’ou roie, cha jean oo skyrraghtyn.

¹³ Gow greme shickyr er ynsagh, ny lhig voïd ee, cum ayd ee, son t’ee dty vioys.

¹⁴ Ny jean gimmeeaght ayns cassan ny mee-chrauee, as ny jean shooyl ayns raad drogh gheiney.

¹⁵ Jean chea roish, ny gow liorish, chyndaa veih, as cosne royd.

¹⁶ Son cha vod ad cadley mannagh vel ad er n’yannoo olk: as ta’n cadley oc goll voue, mannagh der ad er paart dy huittym.

¹⁷ Son t’ad gee arran y vee-chraueeaght, as giu feeyn y dewilys.

¹⁸ Agh ta raad y vooinjer chrauee myr yn soilshey sollys, ta soilshean ny smoo as ny smoo derrey’n ard-vunlaa.

¹⁹ Ta raad ny mee-chrauee myr y dorraghys; cha nhione daue cre roish t’ad dy snapperal.

²⁰ My vac, cur geill da my ghoan, croym dty chleaysh gys my raaghyn.

²¹ Ny lhig ad ass dty hilley, freill ad ayns cree dty chree.

²² Son t’ad bioys dauesyn ta dy gheddyn ad, as slaynt da’n slane callin.

²³ Freill arrey er dty chree lesh ard-chiarail: son magh ass shen ta cheet raaidyn y vea.

²⁴ Cur ersooyl voïd beeal foalsey, as meillyn scammyltagh cur foddey voïd.

²⁵ Lhig da dty hooillyn jeeaghyn jeeragh royd, as ferrooghyn dty hooillyn jeeaghyn dy kiart er dty hoshiaght.

²⁶ Jeeagh dy mie gys kesmadyn dty choshey, as bee shickyrys ayns ooilley dty raaidyn.

²⁷ Ny chyndaa gys y laue yesh, ny gys y laue hoshtal: scugh dty chass veih’n olk.