Raaghyn Creeney 31 - Yn Vible Casherick 1775 1819

CAB. XXXI

¹ Goan y ree Lemuel, ny raaghyn dynsee e voir da.

² Cre, my vac? cre shoh, vac my vreïn? nee shen myr te, vac my vreearraghyn?

³ Ny cur dty niart da mraane, ny dty raaidyn da shen ta cur reeaghyn naardey.

⁴ Cha vel eh son reeaghyn, O Lemuel, cha vel eh cooie da reeaghyn dy chur-rish feeyn; ny da princeyn dy ghoaill jough lajer:

⁵ Er-aggle dy n’iu ad, as dy jarrood ad yn leigh, as dy jean ad cassey briwnys dooinney seaghnit erbee.

⁶ Cur jough lajer dasyn ta ayns raad cherraghtyn, as feeyn dauesyn ta trome-chreeagh.

⁷ Lhig da giu as jarrood e voghtynid, as gyn smooinaghtyn er e heaghyn ny-sodjey.

⁸ Foshil dty veeal son y balloo, ayns y chooish ocsyn ooilley ta ry-hoi goll naardey.

⁹ Foshil dty veeal, cur briwnys cairal, as loayr ayns cooish ny boghtyn as ymmyrchee.

¹⁰ Quoi oddys ben ghreasag vie y gheddyn? son ta’n leagh eck foddey erskyn rubieyn.

¹¹ Ta cree e sheshey dy sauchey treishteil aynjee, myr shen nagh bee eh ayns aggle spooilley.

¹² Nee ish mie y yannoo da, as cha nee olk ooilley laghyn e bea.

¹³ T’ee shirrey ollan as lieen, as gobbraghey dy jeidjagh lesh e laueyn.

¹⁴ T’ee goll-rish lhuingys ny marchanyn, t’ee cur lh’ee beaghey veih foddey.

¹⁵ T’ee girree neesht ’sy vadran, as cur nyn mee da’n vooinjer, as nyn obbyr hene da e inneenyn.

¹⁶ T’ee goaill baght jeh magher as kionnaghey eh: lesh cosney e laueyn hene t’ee plantal garey-feeyney.

¹⁷ T’ee cryssey seose e meeghyn dy gastey, as niartaghey e roihaghyn son obbyr.

¹⁸ T’ee fakin dy vel yn chooid eck vondeishagh: cha vel y cainle eck goll ass ’syn oie.

¹⁹ T’ee cur e meïr gys y fess, as ta ny laueyn eck cummal yn whuiggal.

²⁰ T’ee sheeyney magh e laue gys y voght; dy feer t’ee roshtyn magh e laueyn gys yn ymmyrchagh.

²¹ Cha vel ee ayns aggle erbee roish y sniaghtey son y lught-thie eck: son ta ooilley yn vooinjer eck coamrit dy souyr.

²² T’ee jannoo jee hene coodaghyn lhiabbee cullyrit, ta’n coamrey eck sheeidey as gorrym-jiarg.

²³ Ta’n sheshey eck cronnal ayns y whaiyl, tra t’eh ny hoie mastey shanstyr ny cheerey.

²⁴ T’ee jannoo aanrit keyl, as creck eh; as t’ee jannoo cosney, creck cryssyn rish ny marchanyn.

²⁵ Ta niart as ooashley yn coamrey eck; as bee gerjagh eck ayns y traa ta ry-heet.

²⁶ T’ee fosley e beeal lesh creenaght; as ayns y chengey eck ta’n leigh dy ghiastyllys.

²⁷ T’ee jeeaghyn dy mie gys raaidyn yn lught-thie eck, as cha vel ee gee yn arran nagh vel ee er chosney.

²⁸ Ta’n chloan eck girree seose, as genmys ee bannit; yn dooinney eck myrgeddin, as t’eh coyrt moylley jee:

²⁹ Shimmey inneen t’er n’yannoo dy mie; agh s’ou uss er-y-skyn oc ooilley.

³⁰ Cha vel stoamid agh son shallid, as aalid te fardail: agh ben ta goaill aggle roish y Chiarn, yiow ee shen moylley.

³¹ Cur jeeish jeh mess e obbyr-lauee hene; as lhig da ny obbraghyn eck hene moylley y gheddyn jee ayns ny giattyn.