Raaghyn Creeney 30 - Yn Vible Casherick 1775 1819

CAB. XXX

¹ Goan Agur mac Yakeh, eer y phadeyrys loayr y dooinney rish Ithiel, eer rish Ithiel as Ucal.

² Dy firrinagh ta mee lesh ny sloo dy hushtey na dooinney erbee, as cha vel aym keeayl dooinney.

³ Cha dynsee mee creenaght, chamoo t’aym tushtey ny flaunyssee.

⁴ Quoi t’er n’gholl seose gys niau, ny er jeet neose? quoi t’er haglym yn gheay ayns e ghurn? quoi t’er chiangley ny ushtaghyn lesh cagliagh? quoi t’er hickyraghey ooilley ardjyn y thallooin? cre’n ennym t’er, as cre’n ennym t’er e vac, my ta fys ayd?

⁵ Ta dy chooilley ockle dy Yee slane glen: te ny scaa dauesyn ta coyrt nyn dreishteil ayn.

⁶ Ny jean uss nhee erbee noi’n goo echeysyn, er-aggle dy der eh oghsan dhyt, as dy bee oo er dty gheddyn dty vreagerey.

⁷ Daa red ta mee er yeearree ort; ny obb ad dou roish my voym baase.

⁸ Scugh foddey voym fardalys as breagyn: ny cur dou edyr boghtynid ny berchys, jean mee magh lesh beaghey cooie er my hon:

⁹ Er-aggle dy bee’m lane as dy jarrood-ym oo, gra, Quoi ta’n Chiarn? ny, er-aggle dy bee’m boght, as geid, as goaill ennym my Yee ayns fardail.

¹⁰ Ny jean sharvaant y chassid gys e vainshtyr, er-aggle dy jean eh gweeaghyn dhyt, as dy bee uss ’syn aggair.

¹¹ Ta sheeloghe ayn ta gwee mollaght er nyn ayr, as nagh vel bannaghey nyn moir.

¹² Ta sheeloghe ayn, ta glen ayns ny sooillyn oc hene, as foast cha vel ad nieet veih nyn mroïd.

¹³ Ta sheeloghe ayn, O cre cha ard ta ny sooillyn oc! as ferrooghyn nyn sooillyn troggit seose.

¹⁴ Ta sheeloghe ayn, ta nyn veeacklyn myr cliwenyn, as nyn veeacklyn-keeill myr skynnyn, dy stroie ny boghtyn jeh’n thalloo, as ny ymmyrchee veih mastey deiney.

¹⁵ Ec y ghuillag-cabbyl ta daa inneen, as ad kinjagh geam, T’ooilley, t’ooilley. Ta three reddyn ayn, nagh vel dy bragh jeant magh; dy feer, kiare nagh jir, Te dy liooar:

¹⁶ Yn oaie; as yn vreïn ghennish; yn thalloo nagh vel er ny ooraghey lesh ushtey; as yn aile, nagh vel gra, Te dy liooar.

¹⁷ Yn sooill ta craidey mysh e ayr, as ta gobbal biallys da e voir, nee fiee ny glionney spolgey ass eh; as nee ny urlee aegey gee eh.

¹⁸ Ta three reddyn ayn ta ro ghoillee er my hon, dy jarroo kiare, nagh nhione dou.

¹⁹ Raad urley ’syn aer, raad ard-nieu er creg, raad lhong ayns mean y cheayn, as raad dooinney rish ben-aeg.

²⁰ Lheid cheddin ta aght y streebagh; t’ee gee, as glenney e beeal, gra, Cha vel mee er n’yannoo olk erbee.

²¹ Liorish three reddyn ta’n seihll er ny voirey, as yn chiarroo, nagh vel surranse daue.

²² Liorish sharvaant tra t’eh reill; as liorish ommydan tra t’eh lane bee;

²³ Liorish ben dwoaiagh ’sy stayd phoosee, as inney-veyl ta cheet ayns ynnyd e ben-ainshtyr.

²⁴ Ta kiare cretooryn fardalagh er y thalloo, agh t’ad feer chreeney:

²⁵ Ta ny snienganyn sheeloghe feer faase, ny-yeih t’ad chymsaghey nyn meaghey ro-laue ’sy tourey;

²⁶ Cha vel ny conningyn agh sheeloghe moal, ny-yeih t’ad jannoo nyn dhieyn fo ny creggyn;

²⁷ Cha vel ree er ny locustyn, ny-yeih t’ad goll magh ayns sheshaghtyn;

²⁸ Ta’n doo-oallee dy ghoaill greme lesh e laueyn, as t’ee ayns plaaseyn reeoil.

²⁹ Ta ayn three cretooryn ta shooyl dy mie; as eer yn chiarroo ta stoamey ayns gimmeeaght:

³⁰ Yn lion s’troshey ta mastey beïyn, as nagh vel chyndaa dy lhiattee son nhee erbee:

³¹ Yn coo, as bock ny goair, as ree er kione e heshaght-chaggee.

³² My t’ou er n’yannoo dy ommijagh ayns soiaghey oo hene seose dy mooaralagh, ny my ta drogh smooinaghtyn er ve ayd, lhie dty laue er dty veeal.

³³ S’feer eh, dy vel eeym cheet lesh churnal bainney, as ta cassey yn stroin tayrn fuill: myr shen dy ghoostey corree te greinnaghey streeu.